Кини кэргэнинээн Александралыын хоту дойду эмтээх үүнээйилэрин араас дьаҥҥа хото туттан, айылҕа бэйэтэ анаан биэрбит эмин-томун миэрэтин, састаабын, туох ыарыыны эмтиирин үөрэтэн, чинчийэн, өбүгэлэрбит хаалларбыт билиилэрин үллэстэн, үгүс дьоҥҥо туһалыыллар. Уоллара Дима, кинилэр туйахтарын хатаран, эмиэ эмтээх отторунан араас маастары, эмтэри оҥорор.
Михаил Петрович өр иитиэхтии сылдьыбыт баҕа санаатын толорон, бу араас эмтээх оттору холбоон, "Эбээн чэйэ" диэн, аныгылыы тылынан эттэххэ, саҥа бренд олохтоото. Былырыын оҥорон таһаарбыта. Улуус баһылыга Гаврил Горохов ити олус үчүгэй этиини ылынан, кэскиллээх дьыала буоларын сэҥээрэн, Михаил Петровиһы өйүүргэ эрэннэрбитэ уонна анаан эмтээх оттору хомуйарыгар уматыгынан көмөлөспүтэ.
Отоһут Михаил Петрович өбүгэлэрин саҕаттан Хобоол диэн сиргэ олохсуйан, ол сир аартыктарын барытын кэрийбит, хайаларын дабайбыт, кыра да суол омооннорун биэс тарбаҕын курдук билэр буолан, ханна туох үүнээйи үүнэрин, дьыл ханнык кэмигэр хомулларын барытын чопчу билэр. Биир соҕотох уустуга диэн, Хобоолго диэри айан-сырыы ыарахана, ырааҕа сыттаҕа. Онон улуус баһылыга Гаврил Горохов уматыгынан оҥорбут көмөтө кэмигэр олус наадалаах буолбута саарбаҕа суох.
"Михаил Петрович "Осикат" түөлбэ олохтооҕо буолар. Кини бу соторутааҕыта түөлбэбит кырдьаҕас олохтоохторугар доруобуйаҕа олус туһалааҕынан биллэр үөрэ отун хомуйан аҕалбытын түҥэппиппит. Ол иннинэ эмиэ кытыан оту уонна 54 устуука салапааҥҥа сууламмыт кээһиллэр "Эбээн чэйин" биэрбитин 65-тэриттэн үөһээ саастаах уонна доруобуйаларынан хааччахтаах дьоммутугар биэрбиппит. Пандемия бүрүүкээбит кэмигэр эти-сааһы чэбдигирдэр, харыстыыр күүһү эбэр эмтээх оттор ытык-мааны дьоһун саастаах дьоммутугар бэриллибиттэрэ, биллэн туран, олус үчүгэй", -- диэн "Осикат" түөлбэ көхтөөх олохтооҕо Владислав Колесов санаатын үллэһиннэ.
"Биһиги ахсынньы-тохсунньу ыйдарга дьиэ кэргэнинэн ити коронавирус диэн ааттыыр олус куһаҕан дьаҥҥа сыстан ыалдьыбыппыт. Балыыһаҕа киирбэккэ, дьиэбит иһигэр эмтэммиппит. Ол онно биһиги аймах киһибит Михаил Петрович иммунитеты бөҕөргөтөр эмтээх отторунан оҥоһуллубут чэйин эбии иһэн, төһө да саастаах дьон буолларбыт, чэпчэкитик аһардыбыппыт. Ону таһынан, Миисэ биһиэхэ куруук болбуктаны уонна таба сиир лабыктатын аҕаларын, ону оргутан, утах курдук күҥҥэ үстэ иһэбит. Тымныйыыга, сөтөлгө лабыкта олус туһалаах эбит диэн бэлиэтии көрдүбүт. Оҕонньорбор анаан-минээн бүүчээн ыытын эмп оҥорон иһэрдэрэ эмиэ доруобуйатыгар олус туһалаах. Уоллара Дима кыра эрдэҕиттэн дьонун кытта тыаны-ойууру, туундараны кэрийэн улааппыт оҕо буолан, эмиэ айылҕа эмтиэкэтин олус үчүгэйдик билэр уонна оту-маһы буккуйан, сүһүөх ыарыытын эмтиир маастары оҥорор. Бу курдук биһиэхэ мэлдьи күүс-көмө буолар Миисэбитигэр уонна кини дьиэ кэргэнигэр муҥура суох махтанабыт. Куруук маннык дьоҥҥо өйөбүл буолан, махталларын, үтүө баҕа санааларын ылан, чэгиэн-чэбдик буол диэн алгыыбыт", -- диэн Түгэһиир нэһилиэгин аҕам саастаах олохтооҕо Матрена Афанасьевна Горохова махталын тиэрдэр.
Ити курдук, Эбээн Бытантай улууһун олохтооҕо Михаил Колесов төрөөбүт айылҕата көмүстээҕэр, алмаастааҕар күндү дьиҥ баайын -- эмтээх отторун -- туһанан, үгүс дьоҥҥо көмө буолар. Киниттэн холобур ылан, үтүө санаа үксээн, кэрэ санаа киэркэйэн иһиэхтин!
Светлана Горохова-Харысхаана
-
0
-
0
-
0
-
0
-
0
-
0
