Бэрт соторутааҕыта, биһиги Хатастар, ыһыахпыт буолар анал сирэ нэһилиэкпит иһигэр Баҕарах түөлбэ көнө-налыы, киэҥ нэлэмэн хонуута диэн үөрүүлээх сурах тилийэ көппүтэ. Бу сонуну кыралыын-улаханныын үөрэ-көтө истибиппит, ис сүрэхпититтэн истиҥник ылыммыппыт. Саҥа сир саҥаттан тэриллиини, үгүс хамсаныыны, түбүгү эрэйэр. Буолаары буолан, кылгас кэмҥэ …
Дьэ, бу түгэҥҥэ саха дьонун сайаҕас санаата, түмсүүлээҕэ, сомоҕолоһуута ырылыччы көһүннэ, ол курдук Евгений Пермяков салайааччылаах олохтоох дьаһалта хорсун, хотоойу былаанын, барыллааһынын нэһилиэк барыта даҕаны ытыс үрдүгэр олордон ылан өйөөтө-өйдөөтө, көмө-тирэх, өйөбүл буолла. Үп-харчы өттүнэн Игорь Федоров салайааччылаах «Сэттэ» ХЭТ көмөлөстө.
Ыһыах буолар сирин саамай киэргэлэ, сүдү суолтата сэргэ буолар. Онон туох барыта сэргэттэн саҕаланна. Бастатан туран, сэргэ буолар мас силиһэ-мутуга дириҥээн, лабаата лаглайан, эргимтэтэ кэҥээн көрүҥнүүн дьоһун, модьу-таҕа, этэргэ дылы айыылартан сэргэ буоларга ананан үүнэр. Оннук мастары ыаллыы сытар хаан-уруу аймах-билэ дьоммут олорор Хаҥалас улууһуттан көлүөнэ ситимин тута сылдьар удьуор үлэһит Константин Павлов массыынатынан тиэйэн аҕалбыта. Кэлбит мастары эмиэ үлэ үөһүгэр сылдьар олоххо куруутун көхтөөх Иннокентий Оконешников сүөкээбитэ. Аны ол кэннэ тургутуу буолан, дьэ хайыыр эбиккит диэбиттии ардах, тыал бөҕө түспүтэ. Ол эрээри, баҕа санаа баара ону ыар таһаҕас оҥостубатаҕа – «Хатас хамсааһына» диэн ааттыын хамсааһын буоллаҕа, онон хатырыктааһын бэрт түргэнник бүппүтэ уонна сыаллаах-соруктаах, тэтимнээх, таһымнаах үлэ саҕаламмыта.
Манна түс-бас дьоммут Андрей Малышев, Владимир Габышев, Руслан Павлов, Семен Петров кынаттарын анныгар киирэн, эдэр эрчимнээх, дьоҕурдаах, талааннаах дьоммут Евгений Пермяков, Алексей Апросимов, Алексей Осипов, Михаил Егоров, Семен Игнатьев нэһилиэкпит устуоруйатыгар бэлиэ суолу хаалларар үтүө дьыаланы оҥордулар. Эдэрдэр бары да бу дьоһун, сүдү суолталаах үлэни олохторугар аан бастакы оҥордулар.
Ыһыахтыыр сир куттуун-сүрдүүн, тас көрүҥнүүн сырдык ыраас,чэбэр киһи сүрэҕин ортотунан киирэр ис киирбэх буолар. Онон нэһилиэкпит тэрилтэлэрин кэлэктииптэрэ түмүллэ-хомулла түстүлэр да тиийэн бэрт түргэнник хомуйан-имийэн санаабытыгар көнө-налыы хонуубут нэлэс гына түстэ, имэ тэтэрдэ, киэркэйдэ. Сыыстан-бөхтөн босхолонон, ийэ сир барахсан өрө тыынна. Күн бүгүн илии сылааһын, санаа ырааһын иҥэриммит саламанан ыһыахпыт буолар киэҥ нэлэмэн хонуутун иилии туттубут.
Күнүс күөх кырдалларга, сибэккилээх хонууларга тоҕус аймах туйгуннара тоҕуоруһан, аҕыс аймах ааттаахтара алтыһан, күүс холоһон, кыах тургутуһан ыллылар, дьону-сэргэни сэргэхситтилэр.
-
7
-
4
-
0
-
0
-
1
-
0
