Үүнэр эрэ барыта үлүмнэһэ үрдээтэ, силис-мутук сириэдийэ соноото, лабаа лаглаччы буолла, сэбирдэх сэбэрэтэ сэгэлдьийдэ, чэчик сирэйэ чэмэлийдэ, иннэлээх имэ кэйдэ. Үтүө-мөкү үйэлээх мөҥүрүөн мөккүөрэ мөҥүрээн иһилиннэ, сырдык хараҥа алтыһыыта, хабараан хапсыһыыта харбыалаһа кииристэ. Өҥүрүк куйаас туос сатыы хаамта, от төрдүн аайы быыгынас бырдах, хаһыйа хаамтах аайы күүгүнэс кумаар мунньаҕа.
Сааскы биир күнү мүлчү туппатах номнуо сибиэһэй аһынан күндүлэннэ, сиэдэрэй эбилигинэн аһын-үөлүн минньиттэ, тумалыгынан тунуйда. Силиһинэн аһатааччы, отонунан күндүлээччини ситээри угун уһатта, ситэри сириэдийдэ. Буһуруктуҥу буолаатын кытта хомуйа-имийэ охсоору илиини-атаҕы сууралаабакка, тиэтэйбэккэ-саарайбакка ситэри-хотору ситэрин, кытара-наҕара, харааран-көҕөрөн буһарын, иҥэмтиэтин, туһатын күүтэн аналлаах кэмигэр, сөптөөх күнүгэр хомуйдун. Алааска-хонууга эрдэһит отчут ходуһатын элэҥнэччи, нэлэччи-хоточчу тэлгэттин, дыргыл сыты тарҕаттын. Ньирэйгэ диэн сыалааҕын, сымнаҕаһын туспа тутан сыа-сым курдук суулуу тутан кыбыннын, кыбыыны буллардын, далга тарҕата бырахтын. Ыанар ынах ураты тутуллан, усулуобуйата тупсан, үрүҥ илгэтэ үрүлүйэ сүүрдүн. Үөрүн элбэппит, ахсаанын хаҥаппыт атыыр сылгы тыбыырбахтыы-тыбыырбахтыы таныытынан тыынан, муннутунан буугунаан, сирилис-бурулус көрбөхөлөөн былааһын биллэрэн быыппаһынна, күүһүн көрдөрөн, сүр күүскэ тиҥилэхтээтэ.
Күлүмэн түһэн сүүрэрдиир муҥун биллилэр, ыам бырдаҕын хараҥа былыт халҕаһытыттан халбарыйар аакка сырыттылар, сыһыы бадараанын абыраллаах сөрүүнүн астына биллилэр, киэһэлик түптэ буруотун хонноҕор састылар, налыччы буоллулар, уоскулаҥ тыыныгар киирдилэр.
Оҕо аймах куйаастан сөрүүн ууга киирэн куотта, оонньуу-көрүлүү чалбааттанан, кустук өҥүн күлүмнэттэ. Саастаах өттө итиини итиинэн үтэйэ итии үүттээх чэйи сыпсырыйдылар, сэниэтэ киллэриҥ диэн сылаас аһы сыҥалаатылар. Сандалы мааны сиригэр, быһа охсор ортотугар дагдалаах иһит даадайан киирдэ, сахалыы лэппиэскэлиин кэккэлэстэ, хаһаастаах барыанньатын уурда, дьаһаллаах күөх луугун аҕалла.
Хаартыска: интэриниэт аһаҕас куйаарыттан
-
1
-
0
-
0
-
0
-
0
-
0
