Эҕирис гыннахха агдаканы толорбут сибиэһэй салгын сэргэхситэ, толору тыыннахха түөс муҥунан дьыбар тыына дьигиһитэ киирэн улугурууттан уһугуннарар, чуҥкунуур чуумпуну аймыыр. Лыҥкыныыр аргыар киҥинэйэ куугунуур тыаһа эрдэһит айанньыты арыаллыыр. Үрдүккэ таласпыт тэҥкэ тиит чынайар чыпчаала куйаар киэҥ далайын чугаһатарга, халлааҥҥа харбаспыт бэс мас киэҥ киэлини бэттэх диэки хайыһыннарарга дылы, халыҥ хаар саҕынньаҕын бүрүммүт хатыҥ ханарыйа хаамар хотун хаан дьахтары санатар, хаалсыбатарбын диэбиттии аар хатыҥ оҕото хахыйах мас харса суох түһүммүтү санатар, илии илииттэн иилистиһэ сиэттиһэн сэлэлии хаампыты санатар иирэ талахтар охтубарбыт диэбиттии сөллүбэттии тутуспуттар, ыһыктыбаттыы ылсыбыттар.
Тоҥуу хаар анныгар хаар сылааһын суорҕаннан, чигди хаар анныгар хаар мөһүүрэ толбонун бүрүнэн чэлгийэ үүнүөхтээх барыта силиһин харайар, харыстыыр. Бу барыта мындыр санаалаах муударайтан муударай аар айылҕа дьылы кэми хамсатар күүһэ буоллаҕа.Төрүт дьоммут өркөн өйдөрүнэн аар айылҕа суруллубатах сокуоннарын өйдөөн, ылынан хабыр тыыннаах хабараан тымныы хабарҕалаһар күүһүн уйан күнүн аайы иннин эрэ диэки барарга дьүккүһэн кылгас күннэри, уһун түүннэри туораан кыралаан да буоллар көөрөтөн сырдыкка, сылааска тардыһан сааскыга, ылааҥыга тиийдэхтэрэ. Санаа күүһүнэн сандааран саҥа күнү көрсүөҕүҥ.
Хаартыска: https://pikabu.ru/story/zima_yakutii_vspomnim_krasotu_zimyi_foto_4162343
-
0
-
0
-
0
-
0
-
0
-
0
