Төрөөбүт тыл күнэ – саха дьонун өйө-санаата бөҕөргүүрүгэр, билиитэ-көрүүтэ дириҥииригэр олохторун анаабыт саха интеллигенциятын чаҕылхай бэрэстэбиитэллэригэр, учуонайдарыгар сүгүрүйүү уонна ытыктабыл бэлиэтэ буолар. Төрөөбүт тыл кэхтибэт, сүппэт анала биһигиттэн хас биирдиибититтэн тутулуктаах. Билигин биһиги бары норуоттар бараммат баай тылларын, үйэлээх култуураларын, үтүө үгэстэрин уонна ылбаҕай суруктарын-бичиктэрин харыстаан, хаҥатан кэлэр көлүөнэҕэ тиэрдэр хоруйу тутуохтаахпыт.
Арассыыйа судаарыстыбата төрөөбүт тылы харыстыыр уонна сайыннарар сыаллаах-соруктаах бэлиитикэни ыытар. «Судаарыстыбаннай национальнай бэлиитикэни олоххо киллэрии» судаарыстыбаннай тосхол үлэлиир уонна сылтан сыл сайдан иһэр. Бу сылга парламент уонна бырабыыталыстыба холбоһуктаах быһаарыыларынан Саха Өрөспүүбүлүкэтин «2020–2024 сылларга Саха Өрөспүүбүлүкэтигэр судаарыстыбаннай уонна официальнай тылы харыстааһын уонна сайыннарыы» тосхоло үп-харчы өттүнэн бөҕөргөтүлүннэ.
Сотору кэминэн Арктикатааҕы сэбиэт өйөбүлүн ылбыт «Арктика төрүт олохтоох норуоттарын тылларын уонна култуураларын баайын сыыппаралааһын» бырайыагынан бүтүн аан дойдутааҕы элбэх тыллаах Интернет-порталы тэрийэр кыахтаныахпыт. Судаарыстыбаннай уорганнар уонна уопсастыба кэскиллээх суолу тутуһан төрүт тылбыт эгэлгэ баайын чөл хаалларыахпыт диэн эрэнэбин.
Билиҥҥи кэмҥэ наука бэрэстэбиитэллэрэ, тылы чинчийээччилэр, суруйааччылар, суруналыыстар, култуура уонна искусство үлэһиттэрэ, саха киинэтэ бэйэлэрин хас биирдии айымньыларыгар төрөөбүт дойдуга тапталы иҥэрэн төрүт-уус тылбытын байытар соругу сүгэллэр.
Төрөөбүт Ийэ тылбыт үйэлэр тухары үүнэ-сайда турдун!
Саха Өрөспүүбүлүкэтин
Ил Түмэнин Бэрэссэдээтэлэ
Петр Гоголев
-
0
-
0
-
0
-
0
-
0
-
0
