Босхо федеральнай төлөппүөн нүөмэрэ - 8-(800)-707-32-82. Муус устар 25 күнүгэр, волонтердар 65 үөһэ аҕам саастаах дьоҥҥо биир кэмнээх 491 бородуукта көмөтүн түҥэттилэр. Үс күн иһигэр барыта 2126 бакыат тиэрдилиннэ.
"Ыстаабка биир күн иһигэр аҕам саастаах дьоҥҥо бородуукта, эмп ыларга 214 сайаапка киирэр. Кулун тутар 20 күнүттэн регионнааҕы волонтердар кииннэрэ үлэлиэҕиттэн барыта 10788 сайаапка киирбититтэн, 10674 өҥө оҥоһулунна. Күн ахсын волонтердар ахсаанныгар 20 волонтер эбиллэр. Ол курдук, өрөспүүбүлүкэ үрдүнэн барыта 2637 волонтер буолла. Өрөспүүбүлүкэтээҕи волонтердар куорпустарыгар 4 массыына сыһыарылла сылдьар (СӨ Бырабыыталыстыбатын автобазата), ону таһынан 15 волонтердар бэйэлэрин техникалара буолар. Өрөспүүбүлүкэ үрдүнэн волонтердар барыта 309 техниканан үлэлииллэр.", - диэн СӨ үөрэххэ уонна социальнай коммуникацияҕа миниистири бастакы солбуйааччыта, волонтердар түмсүүлэрин салайааччыта Александр Сусоев @alexandr_susoev кэпсиир.
Өрөспүүбүлүкэтээҕи волонтердар куорпустарын састаабыгар волонтер-медиктар, ОНФ активистара, ХИФУ устудьуоннара уонна онтон да элбэх Саха сирин гражданнара үлэлииллэр. Тэрийээччилэр аһыныгас, баҕа санаанан үлэттэн туора турбат дьону аҕам саастаах дьоҥҥо көмөлөһөргө уонна кыах баарынан волонтерунан үлэлии киирэргэ МЫВМЕСТЕ2020.РФ федеральнай сайтка сайаапка толороллоругар биитэр +7914229-09-54 нүөмэргэ эрийэллэригэр ыҥыраллар.
Санатар буоллахха, өрөспүүбүлүкэ аҕам саастаах дьоно сөптөөх көмө ыларгытыгар колл-кииҥҥэ 8(800)200-34-11 нүөмэринэн эрийэн сайаапка хаалларыаххытын сөп.⠀
-
0
-
0
-
0
-
0
-
0
-
0
