Үөрэх

Арктика оскуолатын дьиэтин 2016 сылтан тутан саҕалаабыттара. Куораттан тэйиччи Сэргэлээх шоссетын 12 килэмиэтиригэр турар, онон улуустан сылдьар оҕолор интэринээккэ олоруохтара. Атырдьах ыйыгар эксээмэн туттаран, барыта 185 оҕо VII, VIII уонна X кылаастарга киирдэ.

Ил Дархан Айсен Николаев:

-- Саха сирин олохтоохторугар барыларыгар үөрүүлээх күн үүннэ. Уһук Илиҥҥэ суох ураты оскуола аһылынна. Дьиэтэ-уота аан дойду таһымыгар эппиэттиир оҥоһуулаах. Сэттэ аҥаар тыһыынча кв. миэтэрэ иэннээх уораҕайга оҕо эргиччи сайдарыгар усулуобуйа барыта баар: бассейнтан саҕалаан, IT кылаастарга тиийэ. Бу оскуола саҥалыы киэптээх, аныгы ирдэбилгэ сөп түбэһэр үөрэх кыһатын бырайыагынан былааннаммыта.  Атын арктическай дойдулар олус сэҥээрдилэр, биһирээтилэр. Биһиги сыалбыт-сорукпут -- маны бүтэрбит оҕолорбут кэлин исписэлиис буоллахтарына, Арктиканы, хотугу эргимтэни сайыннарарга үлэлиэхтээхтэр.

   Норуоттар икки ардыларынааҕы таһымнаах буолан, уруок үксэ  ангылычаан тылынан барыаҕа, эбии француз, кытай, кэриэй тылларын үөрэтиэхтэрэ. Ол иһин тас дойдуттан омук учууталларын ыҥыран үлэлэтэн эрэллэр. Холобура, Нормандияттан төрүттээх Арольд Можер француз тылын биэрэр. “Сахалар биһиги курдук, “ө, һ, ҕ, ҥ” дорҕоонноох буолан, саҥаралларыгар чэпчэки”, -- диэн кэпсиир.

Физика учуутала Афанасий Слепцов манна бэйэтин кыаҕын тургутар, идэтин таһымын үрдэтэр сыаллаах үлэлии кэлбит.  

--Аҕыйах сылынан International Baccalaureate (IB) диэн норуоттар икки ардыларынааҕы бырагыраамаҕа көһүөхтээхпит. Оччоҕо предметтэри барытын омук тылынан үөрэтэр буолабыт. Ол иһин олус интэриэһинэй. Учууталлары онно бэлэмниэхтээхтэр. Билигин сэттистэри IB ирдэбилинэн  үөрэтэн көрүөхпүт, -- диир

--Биһиги Дьокуускай В.П. Ларионов аатынан физико-техническэй лицейиттэн хас да буолан кэлбиппит. Антах да ангылычаан тылын үчүгэйдик үөрэтэллэр эрээри, манна букатын уруоктар кытта омуктуу буолалларын сэҥээрбиппит. Уонна кэлин омук университеттарыгар туттарсар соруктаахпыт. Информатиканы, физиканы, искусствоны дириҥэтэн үөрэтиэхтээхтэр. Оскуолабыт дьиэтэ олус үчүгэй, -- диир Илья Борисов.  

Хаҥалас Үөдэйиттэн Вася Григорьев:

--Мин туттарсан киирэрбэр ангылычаан тылын ыарырҕаппытым. Ол иһин бу тылы олох дириҥэтэн үөрэтэр, баһылыыр сыалы туруордум. Кэлин омук улахан хампаанньаларыгар үлэлиэм. Маннык үчүгэй оскуола аһылларын туһунан сайын дьиэм таһыгар үлэлии сылдьан, араадьыйаны истэн билбитим. Ый курдук бэлэмнэммитим. Уонна бу киирэн дьоллоно турабын.

   Саҥа аһыллыбыт билии кыһата элбэх ситиһиилээх, өрөспүүбүлүкэ киэн туттуута, эрэлэ буоллун!