Үрдүк үөрэхтэр кампустара Дьокуускай 68 кыбаарталыгар тутуллуохтаах, куорат маастар-былааныгар киирбитэ, ону бэрэсидьиэн В.Путин бигэргэппитэ. Кампуска өрөспүүбүлүкэ үс улахан үөрэҕин кыһатын – ХИФУ, АГАТУ уонна АГИКИ – күүһэ-кыаҕа түмүллүөхтээх.
“Капмуспут ис хоһоонун оҥордубут, салгы үлэлииргэ бэлэммит. Валерий Николаевич өрөспүүбүлүкэбит “Аныгы кампустар тиһиктэрин тэрийии” федеральнай бырайыак сүүмэрдиир күрэҕэр кыттарын өйөөтө”, -- диэн Ил Дархан социальнай ситимигэр суруйар.
Сэлии аан дойдутааҕы киинэ – РФ Аартыка эргимтэтин сайдыытын тосхолугар киирбит бырайыак. Ил Дархан киин билимҥэ-үөрэхтээһиҥҥэ хайысхатын Арассыыйа Билимҥэ министиэристибэтигэр сүрүннүүргэ этии киллэрдэ. Министиэристибэ ылыстаҕына, киин судаарыстыбаннай бырагыраамаларга ылсан, Арассыыйа билимҥэ пуондатын граннарыгар кыттыһар суола арыллыахтаах.
Миниистир Валерий Фальков икки бырайыак Арассыыйа Арктикатааҕы эргимтэтигэр үрдүк үөрэх сайдыытыгар кырата суох суолталаахтарын бэлиэтээн туран, иккиэннэрин өйөөтө.
“Билим министиэристибэтин өйөбүлүнэн бырайыактары салгыы олоххо киллэрэр үлэ саҕаланыаҕа”, -- диэн Айсен Сергеевич бэлиэтээтэ.
Хаартыска: https://minobrnauki.gov.ru/
-
0
-
0
-
0
-
0
-
0
-
0
