Саха сириттэн кэлбит дэлэгээттэр: СӨ Билимин Акадьыамыйатын төрөөбүт тыллары үөрэтэр, харыстыыр уонна сайыннарар Киин салайааччыта, педагогика билимин дуоктара Габышева Феодосия Васильевна; СӨ Билимин Акадьыамыйатын төрөөбүт тыллары үөрэтэр, харыстыыр уонна сайыннарар Киин сүрүн научнай үлэһитэ, педагогика билимин кандидата Унарова Вилена Яковлевна; РФ норуоттарын Төрөөбүт тылларын федеральнай институтун Саха сиринээҕи филиалын дириэктэрэ Дедюкина Светлана Валерьяновна; РФ норуоттарын төрөөбүт тылларын федеральнай института Саха сиринээҕи филиалын полилингвальнай үөрэхтээһиҥҥэ отделын начаалынньыга Ситникова Наталья Васильевна; Сунтаардааҕы политехническай лиссиэй-интэринээт саха тылын уонна литературатын учуутала, тыл хамсааһынын актыбыыһа Афанасьева Сардаана Афанасьевна; культурологическай хайысхалаах предметтэри дириҥэтэн үөрэтэр Арктикатааҕы Экспериментальнай оскуола-интэринээт эбээн тылын уонна литературатын учуутала Очирова Надежда Максимовна.
Сүрүн дакылааттартан Феодосия Габышева дакылаатын кыттааччылар ордук биһирээтилэр. Феодосия Васильевна үрдүк сыанаттан дакылаатын түмүктээн тахсан истэҕинэ, Чечен, Дагестан, Татар, Кабардино-Балкария, Камчатка уо.д.а бэрэстэбиитэллэрэ сүүрэн кэлэннэр, олус хайҕаан, илии тутуһан астыммыттарын биллэрдилэр, “бүттүүн норуоттар ааттарыттан эттин” диэн долгуйан махтаннылар.
Сийиэс бастакы күнэ Арассыыйаҕа элбэх тыллаах үөрэхтээһин кэскилин туһунан ис хоһоонноох кэпсэтиигэ күүстээх саҕалааһын буолла. Сарсыардаттан кыттааччыларга төрөөбүт тыллар эйгэлэрин сайыннарыы сүрүн ориентирдарын туруорбут эҕэрдэ тыллар туһаайылыннылар.
РФ үөрэҕин миниистирэ Сергей Кравцов педагогтар сыралаах үлэлэрин суолтатын тоһоҕолоон бэлиэтээтэ:
– Арассыыйаҕа биир кэлим үөрэх эйгэтэ үөскээтэ. Оҕолорго кыра саастарыттан дойдуларыгар тапталы иҥэрэр төрөөбүт тыл учууталлара патриотическай иитиигэ саарбаҕа суох кылааты киллэрэллэр. Биһиги оҕолору төрөөбүт дойду култууратын, үгэстэрин билиһиннэрэр педагогтарга тылы үөрэтии нөҥүө өйөбүлбүтүн салҕыыбыт. Федеральнай үлэ бырагыраамаларын уонна учебниктарын бэлэмниибит. Уопсайынан, дойду үрдүнэн үс мөлүйүөн тахса үөрэнээччи 75 төрөөбүт тылы үөрэтэр.
РФ Тас дьыалаҕа миниистирин солбуйааччы Дмитрий Любинскай тыл уонна култуура өйөбүлүгэр судаарыстыба оруолун бэлиэтээтэ:
– Тыл араас көрүҥүн харыстааһын уонна сайыннарыы боппуруоһа судаарыстыба болҕомтотун киинигэр турар. Кэнники сылларга федеральнай уонна эрэгийиэннээҕи былаас уорганнарын, уопсастыбаннай тэрилтэлэр, учуонайдар уонна преподавательскай уопсастыбалар күүстэринэн төрөөбүт тыллары үөрэтии уонна харыстааһын хаачыстыба өттүнэн саҥа таһымҥа таһаарыыга дьоһун хардыы оҥоһулунна.
Сийиэс үлэтин сүрүн түмүгэ – чугастааҕы сылларга элбэх тыллаах үөрэхтээһин сайдыытын сүрүн хайысхаларын быһаарар стратегическай докумуон ылылынна.
Резолюцияҕа элбэх соруктар уонна рекомендациялар киирдилэр: полилингвальнай үөрэхтээһини өйөөһүн, научнай-методическай базаны сайыннарыы, педагогическай каадырдары бэлэмнээһини тупсарыы, методическай матырыйааллары атастаһыыга биир кэлим цифровой миэстэни тэрийии, төрөөбүт тыл учууталларын өйүүр дьаһаллары кэҥэтии, үөрэх тэрилтэлэрин ситимнээхтик бииргэ үлэлээһиннэрин сайыннарыы уонна идэ тэрээһиннэрин, куонкурстарын уонна олимпиадаларын тиһигин быспакка ыытыы.
РФ үөрэҕириитин министиэристибэтигэр, эрэгийиэннээҕи былаас уорганнарыгар уонна төрөөбүт тыллар федеральнай институтугар туһуламмыт этиилэргэ ураты болҕомто уурулунна. Олор Арассыыйа норуоттарын төрөөбүт тылларын үөрэтии федеральнай кэнсиэпсийэтин олоххо киллэриигэ, учебниктары уонна научнай-методическай комплекстары оҥорууга, педагогтар квалификацияларын үрдэтиигэ, элбэх тыллаах үөрэх инфраструктуратын бөҕөргөтүүгэ сыһыаннаахтар.
Дэлэгээттэр резолюция балаһыанньаларын үөрэх тиһигин стратегическай докумуоннарыгар, бастатан туран, 2036 сылга диэри үөрэҕи сайыннарыы Стратегиятыгар киллэрэр наадатын тоһоҕолоон бэлиэтээтилэр.
Сардаана Афанасьева, Сунтаардааҕы политехническай лиссиэй-интэринээт саха тылын уонна литературатын учуутала,
тыл хамсааһынын актыбыыһа.
-
3
-
1
-
0
-
0
-
0
-
0
