Сахабыт Сирин экэниэмикэтин сайыннарарга туһалаах, идэлэрин таба тайаммыт, үлэлэрин сөбүлүүр, ол аата көдьүүстээхтик үлэлиир-хамсыыр дьону иитэн таһаарарга, сөптөөх үөрэххэ киирэллэригэр сүбэлииргэ Ил Түмэн бэрэссэдээтэлин бастакы солбуйааччыта Александр Жирков бэҕэһээ Уус Алдан улууһун Мүрүтээҕи «Уолан» уолаттар гимназияларын 10 кылааһын үөрэнээччилэрин кытта көрүстэ. Маннык көрсүһүү үтүө үгэс быһыытынан үйэ чиэппэрин тухары ыытыллар.
Александр Жирков оҕолор ханнык үөрэххэ туттарсыахтарын баҕарар испииһэктэрин көрөн баран бары тутуспутунан ХИФУ-ну талбыттарыттан соһуйбутун-сонньуйбутун биллэрдэ. Урут үөрэнээччилэр 60-70% өрөспүүбүлүкэ тас өттүгэр баар үрдүк үөрэх кыһаларыгар киириэхтэрин баҕарар этилэр, оттон күн бүгүн бары ХИФУ-ну талбыттарын бэлиэтээтэ. Ким даҕаны ийэ-аҕа көрүүтүттэн, сылаас сыһыаныттан барыан баҕарбатын аҕынна. Үгүстэр биир бакылтыаты талбыттар, онон бэйэ-бэйэлэрин кытта күрэс былдьаһыахтара, ким эрэ баала хапсыбатаҕына туоруо. Онон гимназия дириэктэрэ Валерий Валерьевич Рожин маны учуоттуурун, бу хайысханан үлэлэһэригэр эттэ.
«Гимназия өрөспүүбүлүкэ экэниэмикэтин сайыннарарга дэписиит идэлээх дьону бэлэмнииргэ, тустаах идэлээх үлэһиттэр тиийбэттэрин ону хааччыйарга ананан тэриллибитэ. Каадырдары бэлэмнииргэ, сөпкө аттаран туруорарга департамент тэриллэн үлэлээбитэ билигин Үөрэх уонна билим министиэристибэтин иһинэн баар.
Үөрэххитин бүтэрэн баран дойдугутугар эргиллэн кэлэн өрөспүүбүлүкэ каадырдары бэлэмнээбэт эрээри, наадыйар сэдэх идэтигэр үлэлиэхтээх этигит. Итинник бэлиитикэ 1993 с. ыытыллар.
ХИФУ-га киириэххитин баҕараргыт олохтоох үнүбүрсүөт риэйтинэ үрдүгүн көрдөрөр, оттон өрөспүүбүлүкэҕэ 15 үрдүк үөрэх кыһата баар, онтон саатар ХИФУ филиалын Мииринэйдээҕи политиэхиньиичэскэй үнүстүүтү талбатаххыт. Бары Дьокуускайга хаала сатыыгыт, бэйэ-бэйэҕититтэн хал буола иликкит, тэйсиэххитин баҕарбаккыт. Дьиҥэр, гимназияны бүтэрэн баран дойду араас куораттарынан тарҕаһан, өрөспүүбүлүкэҕэ наадалаах идэҕэ үөрэнэ барыахтаах этигит», — диэн санаатын эттэ Александр Жирков.
Хамсык дьаҥын, сааҥсыйа иннинэ оҕолору бэл Арассыыйа тас өттүгэр үөрэххэ ыыталлара, ол ороскуотун өрөспүүбүлүкэ уйунара. Парламент бастакы вице-спикерэ аҥаардастыы ХИФУ-га эрэ бэлэмнииргэ гимназия тэриллибитэ төһө сөптөөҕүн ыйытта. Өһүргэммэккэ киһи арыый үрдүк сыалы-соругу туруорунуохтааҕын сүбэлээтэ.
2000-2015 сылларга Мүрүтээҕи «Уолан» гимназия выпускниктара 90-100% үрдүк үөрэххэ киирэллэрэ, аҥаардара өрөспүүбүлүкэ тас өттүгэр, Москуба, Санкт Петербург престижнэй ньиэп-гаас, энергетика кыһаларыгар үөрэнэллэрэ. Дьокуускайга хаалар дьон кыбыстыах курдук этилэр.
СӨ Үөрэххэ министиэристибэтин билимҥэ, идэҕэ үөрэтиигэ, тус сыаллаах бэлэмнээһиҥҥэ судаарыстыбаннай бэлиитикэни ыытар департаменын салайааччытын солбуйааччыта Александр Кочмар дойду үрдүнэн быйыл үөрэххэ киирии бэрээдэгин, өрөспүүбүлүкэҕэ ханнык үлэһиттэр наадаларын туһунан иһитиннэрдэ. Ону таһынан, ХИФУ приемнай хамыыһыйатын начаалынньыга Елизавета Ильина үнүбүрсүөккэ киирии бэрээдэгин туһунан билиһиннэрдэ. Икки дакылааччыты истэн баран гимназия үөрэнээччилэрэ интиэриэһиргиир ыйытыктарыгар хоруй ыллылар.
Ол туһунан сиһилии "Ил Түмэн" хаһыакка ааҕыҥ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
