Космофизикаттан, хараабылы тутууттан ураты манна бары идэҕэ үөрэтэллэр. Учууталлартан саҕалаан, стоматологтары, ньиэп-гаас үлэһиттэрин бэлэмнииллэр. Билиҥҥи туругунан, саамай элбэх устудьуон инженер идэтигэр тиэхиньиичэскэй хайысханан үөрэнэр, электроэнергетика эмиэ ити салааҕа киирсэр. Устудьуоннар үөрэхтэрин таһынан, интэриэстэринэн көрөн эбии дьарыктаналлар, араас тэрээһиннэргэ, күрэхтэһиилэргэ кытталлар. Былырыын ХИФУ хамаандата Бүтүн Арассыыйатааҕы турнирга иккис миэстэни ылбыт.
ХИФУ Байыаннай үөрэҕин киинигэр сыл ахсын бастакы кууруска 25-40 киһини ылаллар, кинилэр икки сыл бэйэни, дойдуну көмүскүүргэ үөрэнэллэр, сайын сборга сылдьаллар. Былырыын Владивостокка эрчиллибиттэрэ. Онтон икки сылынан байыаннай билиэти ылаллар, үнүбүрсүөтү бүтэрбиттэрин кэнниттэн кинилэри Аҕа дойдуну көмүскүүр сулууспаҕа ыҥырбаттар. Манна киирэргэ уолаттар доруобуйаларын туругун уонна успуорка ситиһиилэрин көрөллөр.
Үнүбүрсүөккэ 17 үөрэх кыһата, 3 филиал, 12 үнүстүүт, 5 балыктыат, 13 устудьуоннар уопсайдара, 1 Мэдиссиинэ килииникэтэ, юридическай, инфраструктурнай технология кэллиэһэ уонна «Сэргэлээх уоттара» култуура киинэ баар. ХИФУ-га дойду 58 эрэгийиэниттэн 19 000 тахса устудьуон, 38 омук сириттэн 800 устудьуон үөрэнэр. Үөрэх кыһатыгар 4120 бүддьүөт миэстэтэ көрүллүбүт. Мииринэйдээҕи уонна Нерюнгритааҕы салаа таһынан Чукоткаҕа, Анадырьга филиал эмиэ баар.
ХИФУ-га туттарсарга куоракка киирэ сатаабакка докумуоннары дьиэҕэ олорон «Госуслуги» нөҥүө ыытыахха сөп. Бүддьүөт миэстэтигэр киирбэтэх оҕолор тус сыаллаах үөрэххэ эмиэ судаарыстыба порталын нөҥүө сайабылыанньаларын ыыталлар. Үөрэх кыһатын саайтыгар абитуриеннар БКЭ калькуляторыгар баалларын суруйаллар, оччоҕуна ханна киириэхтэрин сөбүн суоттаан таһаарар.
ГТО туттарбыт оҕолорго 2-4 баал, оскуоланы туйгуннук бүтэрбит медалистарга 7 баал, волонтердар хамсааһыннарын кыттыылаахтарыгар 2-4 баал эбиллэр, успуорка ситиһии иһин 1-8 баал, байыаннай сулууспаны ааспыттарга 7 баал ааҕыллар, ити курдук уопсайа көхтөөх оҕолор 10 баалы эбии аахтарыахтарын сөп. Үөрэххэ киирэргэ ити быһаарыылаах буолар кыахтаах.
Хаартыска Саргын Скрябин, СИА,
-
0
-
0
-
0
-
0
-
0
-
0
