Бэс ыйын 17 күнүгэр иһитиннэриилэри киэҥник тарҕатар сириэстибэлэр үлэһиттэрэ саҥа идэлэри кытта билистилэр. Ол курдук, быйылгыттан 9 кылаас базатыгар “Асчыт уонна кондитер дьыалата” (Поварское и кондитерское дело) диэн саҥа хайысханан устудьуоннары үөрэтэн саҕалыахтара. Санаттахха, былырыын “Электроэнергетика уонна электротехника”, “Теплоэнергетика уонна теплотехника”, “Информационная технологиялар уонна бырагыраамалааһын” диэн уруккута суох хайысхалар киирбиттэрэ.
Билигин асчыт уонна кондитер идэлэрэ аан дойдуга биир саамай кэскиллээх идэлэр ахсааннарыгар сылдьаллар. Ол туһунан суруналыыстарга Саха сирин ресторатордарын уонна отельердарын федерациятын бэрэссэдээтэлэ Татьяна Тымырова уонна “Аврора” эрэстэрээн сүрүн асчыта Иннокентий Лукин бэлиэтээн эттилэр. Салгыы технологическай үөрэхтэргэ уһуйааччы Мария Местникова саҥа хайысхаҕа үөрэнэ киирбит оҕолор туох сатабыллары баһылыылларын туһунан сиһилии сырдатта. Тэрээһин кэмигэр кондитерскай бүлүүдэлэри амсатыы түгэнэ буолан ааста.
Даҕатан эттэххэ, быйыл АГАТУ 1300 устудьуону үөрэххэ ылыахтаах, ол иһиттэн 773 миэстэ үрдүк үөрэххэ, 130 миэстэ орто үөрэххэ уонна 377 миэстэ төлөбүрдээх үөрэххэ бэриллибиттэр. Балартан 903 миэстэ бүддьүөттэн үбүлэнэр.
Онон быйылгы үөрэх сылыгар абитуриеннар АГАТУ саҥа хайысхаларын сэҥээриэхтэрин сөп. Ол иһигэр “Асчыт уонна кондитер дьыалата” диэн кэскиллээх идэҕэ туттарсар кыахтаахтар. Этэргэ дылы, аныгы үйэҕэ киһи баҕарбыт үөрэҕэ барыта баар буолла. Баҕарыахха, табатык талыахха эрэ наада.
Үөрэххэ туттарсыы туһунан сиһилии АГАТУ “приемнай” хамыыһыйатыттан билсиэххитин сөп. http://www.agatu.ru/ сигэнэн киирэн билсиҥ.
-
0
-
0
-
0
-
0
-
0
-
0
