Үөрэх

Саха сирин дэлэгээссийэтин састаабыгар ФИЦ «РАН Саха сиринээҕи научнай киин Сибиирдээҕи салаатын» уонна М. К. Аммосов аатынан ХИФУ научнай институттарын чинчийээччилэрэ киирэллэр диэн ФИЦ «РАН Саха сиринээҕи научнай киин Сибиирдээҕи салаатын» пресс-сулууспата суруйар. Кэнгириэскэ РФ Наукаҕа уонна үөрэхтээһиҥҥэ миниистирэ Валерий Фальков, РФ Бэрэсидьиэнин көмөлөһөөччүтэ Андрей Фурсенко, РФ Бэрэсидьиэнин иһинэн наукаҕа уонна үөрэх эйгэтин ыччат дьыалаларыгар координационнай Сэбиэт бэрэсээдээтэлэ Никита Марченков кыттыыны ылаллар.

Кылаабынай научнай үлэһит, ФИЦ «РАН Саха сиринээҕи научнай киин Сибиирдээҕи салаата» мамонт фаунатын сэлии муоһун, уҥуоҕун, кырамтатын хостуур уонна оҥорон таһаарар технологияҕа лабораториятын сэбиэдиссэйэ Евгения Петухова биир идэлээхтэригэр лаборатория үлэтин туһунан билиһиннэрдэ. Лаборатория соругунан, мамонт фаунатын, сэлии муоһун, палеонтологическай тобохторун көрдүүргэ уонна хостуурга ресурсаларын харыстыыр ньымалары оҥоруу буолар.

ФИЦ «РАН Саха сиринээҕи научнай киин Сибиирдээҕи салаатын» Аартыкаҕа уонна Субарктикаҕа инновационнай технологияларга лабораториятын научнай үлэһитэ Айсен Кычкин, Кэнгириэс араас салаа бэрэстэбиитэллэрэ чугасаһалларыгар, бииргэ түмсэн үлэлииллэригэр туйгун былаһаакка буоларын туһунан кэпсээтэ. «Бырамыысыланнай хайысханы сайыннарыыга, учуонайдар, биһиги курдук, ханнык хайысханы уонна технологическай сайдыыга хайдах суоллары тутуһалларын, Арасыыйаны бүттүүн сайыннарар кыахпытын туһунан дойду бөдөҥ корпорацияларын бэрэстэбиитэллэрэ көрдөрдүлэр уонна быһаардылар», - диэтэ Айсен Кычкин.

ФИЦ «РАН Саха сиринээҕи научнай киин Сибиирдээҕи салаатын», СӨ Ирбэт тоҥу үөрэтэр институт сүрүннүүр научнай үлэһитэ, М.В. Ломоносов аатынан МГУ дуоктара Иван (Сайа) Христофоров бэлиэтииринэн, дойду атын эрэгийиэннэрин биир идэлээхтэрэ  өрөспүүбүлүкэтээҕи эдэр учуонайдары өйүүр пуонда үлэтин, уопутун интэриэһиргииллэр. «Билигин биһиги сүрүн сорукпут - Уһук Илин уокурукка киэҥ далааһынаахтык пуонда үлэтин тарҕатыы», - диэн Иван Христофоров иһитиннэрдэ уонна килиимэт сылыйыыта ирбэт тоҥ сиригэр сабыдыалларын, Уһук Илин уокурукка научнай пуонда тэриллиитин тустарынан кэнгириэскэ дакылааттары аахта.

Пуонда үлэтэ эдэр учуонайдар квалификацияларын үрдэтиигэ, эрэгийиэн өттүттэн прикладной түмүктэри ылыыга, Уһук Илин уокурукка научнай конференциялары ыытыыга, научнай түмүктэри билинэргэ, Бүтүн Арассыыйатааҕы уонна Аан дойдутааҕы научнай конференцияларга эдэр учуонайдар кыттыыны ылан, норуоттар икки ардыларынааҕы научнай сибээстэри олохтуурга туһуланар.

Маны таһынан Андрей Фурсенко дойду Бэрэсидьиэнин көмөлөһөөччүтүн кытта Иван (Сайар) Христофоров Уһук Илиҥҥи чэпчэтиилээх ипотеканы ылааччылар ахсааннарыгар РАН академическай институттарын учуонайдарын уонна үрдүк үөрэх кыһатын преподавателлэрин киллэрэр наадатын туһунан кэпсэттэ.

Кэнгириэс дойдуга сүрүннүүр научнай оскуолаларын араас эрэгийиэннэриттэн, научнай уонна үөрэх тэрилтэлэрин, былаас уорганнарын, научнай-оҥорон таһаарар тэрилтэлэри уонна бөдөҥ корпорациялары, аан дойду наукатын чаҕылхай дойду лидердэрин түмэр. Манна дойду үрдүнэн 3 тыһ. тахса киһи кыттыыны ылар. Ону таһынан тэрээһин былаһааккатыгар, чинчийиилэринэн дьоһуннаах түмүктэри ситиспит учуонайдары, граннар кыайыылаахтарын, чинчийиигэ үрдүк көрдөрүүлээх устудьуоннары уонна үөрэнээччилэри түмэр.