Пальмира Георгиевна Петрова – медицина билимин дуоктара, профессор, үрдүкү оскуола аан дойдутааҕы академиятын чилиэн-корреспондена, СӨ академиятын академига, ХИФУ медицина институтун дириэктэрэ (1996-2016), кафедра сэбиэдиссэйэ. Арассыыйа айылҕаҕа сыһыаннаах билимҥэ академиятын П.Л. Капица аатынан өйдөбүнньүк мэтээлинэн, Софья Сидорова аатынан бочуоттаах бэлиэнэн наҕараадаламмыта. РФ доруобуйа харыстабылын туйгуна (2001), СӨ билимин үтүөлээх деятелэ (1998), РФ үрдүкү үөрэҕин үтүөлээх үлэһитэ (2005), П.А. Петров аатынан СӨ бириэмийэтин лауреата, СӨ доруобуйа харыстабылын туйгуна (2013), ХИФУ бочуоттаах бэтэрээнэ (2016), СӨ “Гражданскай килбиэн” бэлиэтин кавалера. 2014, 2016 сс. РФ Президенэ Владимир Путин Махтал суруктарын туппута. Үөһээ Бүлүү, Алын Дьааҥы улуустарын Бочуоттаах гражданина. Кини үһүс ыҥырыылаах Ил Түмэҥҥэ СӨ бар дьонун дьокутаата. 2003 с. РФ төрдүс ыҥырыылаах Госдуматын быыбарыгар “Биир ньыгыл Арассыыйа” партия итэҕэллээх киһитинэн буолбута. Чинчийээччи быһыытынан, тулалыыр эйгэ киһи доруобуйатыгар сабыдыалын, айылҕа киртийиитэ Саха сирин дьонун-сэргэтин доруобуйатыгар охсуутун үөрэтэр.
П.Г. Петрова 1944 с. бэс ыйын 28 к. Алын Дьааҥы оройуонугар Куоҕастаахха төрөөбүтэ. 1961 с. Үөһээ Бүлүүгэ И.Н. Барахов аатынан орто оскуоланы бүтэрбитэ, ол кэнниттэн СГУ медицинаҕа факультетыгар үөрэнэ киирбитэ. 1967 с. бүтэрэн, факультекка үлэҕэ хаалбыта. 1971 с. кандидат, онтон 1995 с. дуоктар солотун көмүскээбитэ. 600-тэн тахса чинчийэр үлэлэрдээх.
Бу бэрт быыччык, мындыр үлэни биллэр төрүччүһүт, математика билимин кандидата Марк Петрович Григорьев суруйбут. Альманах инники нүөмэрдэригэр, эмиэ кини суруйан, академик Анатолий Игнатьевич Гоголев, профессор Василий Васильевич Илларионов төрүччүлэрэ тахсан тураллар.
Төрүччүһүт уонна эрэдээксийэ маннык үлэни кэлэр сылга салгыыр санаалаахтар.
-
0
-
0
-
0
-
0
-
0
-
0
