Ыам ыйын 23 күнүнээҕи туругунан эбии 100 киһи ыалдьыбыта биллибит. “Ыарыы тарҕаныыта хонтуруолга ылыллыах курдук буолбута. Ол эрээри, халлаан сылыйбытын кэннэ дьон харыстаммакка таһырдьа тахсаннар, ыалдьыбыт дьон ахсаана элбээтэ. Дьиэ кэргэттэргэ бэйэ-бэйэлэриттэн сыстыы элбэх”, -- диэтэ.
Киһи дьиксинэрэ, оҕолор дьаҥҥа хаптарыылара элбээбит. Бүгүҥҥү туругунан 176 оҕо ыалдьыбыта биллэр.
Айсен Николаев дьон дьиэҕэ олоруу эрэсиимин кэһэллэриттэн, автобуһунан айаннааһын элбээбититтэн ыарыы түргэнник тарҕанарын ыйда. Дьон бэйэ-бэйэлэрин кытары хантаактаһалларын хааччахтааһын миэрэтэ күүһүрдүллүөҕүн туһунан иһитиннэрдэ. “Атыы-эргиэн кииннэригэр дьон мааската суох сылдьара бобуллуоҕа. Биир атыылаһааччыга 4 кв. м. иэн ананыаҕа, атыттар таһыгар күүтүөхтээхтэр. Автобустарга мааската суох дьон киллэриллиэ суохтаахтар. Мааска кэтии эрэсиимин кэспиттэргэ уонна дьиэҕэ олоруу эрэсиимин кэспиттэргэ сыһыаннаан ыстыраап күүһүрүөҕэ”, -- диэтэ.
Чугас кэминэн хааччахтааһын миэрэлэрин уһулуу туһунан боппуруос турбатын туһунан иһитиннэрдэ. Ол курдук, өрөспүүбүлүкэҕэ ыалдьыбыт киһи ахсаана 1177 тэҥнэспит. Ол онтон 503 киһи үтүөрбүт.
Нам уһууһугар 40 киһи ыарыыга хаптарбыт, хроническай ыарыылаахтары уонна кырдьаҕастары Дьокуускай инфекционнай балыыһатыгар аҕалан эмтииллэр.
-
0
-
0
-
0
-
0
-
0
-
0
