Эдьигээн эбэҥки национальнай оройуонун дьаһалтата, тохсунньу 5 күнүн сарсыарда 6 чаастааҕы иһитиннэриитинэн, Эдьигээн нэһилиэгин чоҕунан оттуллар киин "Кыайыы 60 сыла" хочуолунайыгар 5 хочуол үлэлиир. Билигин үлэһиттэр 6-с хочуол алдьаныытын өрөмүөннүүллэр. Бу иннинэ аҕай, бүгүн сарсыарда 5 чаас 50 мүнүүтэҕэ Ньурбаттан бөртөлүөт көтөн кэллэ, «СӨ ОДьКХ» судаарыстыбаннай унитарнай тэрилтэ 8 үлэһитин уонна сэби-сэбиргэли (300 киилэ) аҕалла. Эдьигээҥҥэ үлэлиир хочуолунай курдук эбийиэк Ньурбаҕа үлэлии турарынан, бу улуус хомунаалынай хаһаайыстыбатын үлэһиттэрэ уопуттаахтарын учуоттаан маннык быһаарыныы ылыммытар.
Ону кытта, бүгүн Дьокуускайтан АН-26 сөмөлүөт көтөрө, саппаас чаастары аҕалара былааннанар.
Оройуон дьаһалтата электроуот илииньийэтигэр ноҕуруусканы аччатар сыалтан нэһилиэнньэни таһырдьа уоттары, саҥа дьыллааҕы киэргэл гирдляндалары араарарга сүбэлиир уонна уоттан, баһаартан сэрэхтээх буоларга ыҥырар. Билиҥҥитэ ЫБММ биллэриллэ илик.
Күнү-дьылы кэтээн көрөр сулууспа биллэрэринэн, бүгүн, тохсунньу 5 күнүгэр Эдьигээҥҥэ сарсыарда 9 чааска 42 кыраадыс тымныы бэлиэтэнэр, сарсын сарсыарда 48, сарсын киэһэ 40 кыраадыс буолара сабаҕаланар.
Хаартыскалар: Улусмедиа
-
0
-
0
-
0
-
0
-
0
-
0
