Тохсунньу 6 күнүн сарсыарда 8 чаастааҕы дааннайынан, киин хочуолунай 6 № -дээх ититэр пуунугар өрөмүөнү түмүктээтилэр, бүгүн иһинэн салгыы 4 №-дээх ититэр пууҥҥа өрөмүөнү бүтэриэхтээхтэр. Эдьигээн нэһилиэгин олохтоохторо бу үлэлэр түмүктэринэн бүгүн ититэр ситимҥэ уу температурата үрдээн, дьиэлэр сылыйалларыгар эрэнэбит диэн суруйаллар. 
Санаттахха, бэҕэһээ, тохсунньу 5 күнүгэр сарсыарда эрдэ Ньурбаттан бөртөлүөт көтөн «СӨ ОДьКХ» судаарыстыбаннай унитарнай тэрилтэ 8 үлэһитин уонна сэби-сэбиргэли (300 киилэ) аҕалла, ону таһынан Дьокуускайтан хочуоллары өрөмүөннүүргэ туттуллар саппаас чаастары илдьэ АН-26 сөмөлүөт киэһэ 18 ч. тиийдэ. Билиҥҥитэ саахалы туоратыыга 18 исписэлиис быһаччы үлэлэһэр. 
Эдьигээн улууһун Бэстээх нэһилиэгин хочуолунайыгар буолбут баһаарга тахсыбыт саахалы туоратыы салҕанар. Билигин олорор дьиэлэр электруот хочуолларга көһөрүлүннүлэр, оскуола - оҕо саад дьиэтигэр ититэр үлэлэр салҕаналлар. Үлэ, үөрэх саҕаланнаҕына оҕо саад оскуола өттүгэр үлэлиирэ быһаарылынна.
Тохсунньу 5 күнүгэр Дьокууускайга ыытыллыбыт ЫБММ уонна баһаарынай куттал суох буолуутун хааччыйыы өрөспүүбүлүкэтээҕи хамыыһыйатын мунньаҕар Ил Дархан Айсен Николаев Бэстээх нэһилиэгэр тутулла турар саҥа хочуолунай тутуутун салгыырга уонна төһө кыалларынан кылгас болдьоххо үлэҕэ киллэрэргэ соруйда. Ону тэҥэ, нэһилиэккэ бородууктанан хааччыйыыны хонтуруолга тутарга эттэ.
Хаартыска: Gtrksakha, Улусмедиа
-
0
-
0
-
0
-
0
-
0
-
0
