Чинчийии түмүгэ
Дьэ, онтукайбыт хас кыраадыска коронавирус өлөр эбитий? Соторутааҕыта Франция Прованс университетын учуонайдара коронавирус хас кыраадыска өлөрүн чинчийэн көрдүлэр уонна маннык түмүккэ кэллилэр. Ол курдук, коронавирус 92 кыраадыска 15 мүнүүтэ иһигэр өлөрүн быһаардылар.
Учуонайдар бастаан коронавируһу 60 кыраадыс итиигэ биир чаас устата тутан көрбүттэрэ. Итиччэ кыраадыска көстүбэт үөн туох да буолбатаҕа, этэргэ дылы, өлбөт үөн буолан биэрбитэ.
Маны таһынан учуонайдар ыраас, стерильнэй уонна кирдээх пробиркаҕа эмиэ вируһу тутан көрбүттэрэ. Тустаах чинчийии түмүгэр ыраас пробиркаҕа баар үөннэр түргэнник өлбүттэр. Оттон кирдээххэ туох да буолбатахтара.
Бу иннинэ Канада Альберто университетын учуонайдара Эбола вируһу эмтиир ремдесивир диэн эмп коронавирус тарҕанарын тохтоторун быһаарбыттара.
Оттон биһиги тыйыс тымныыбыт бу иэдээннээх дьаҥтан быыһыа диэн бүк эрэллээхпит.
-
0
-
0
-
0
-
0
-
0
-
0
