«Биһиги балыыһабыт коронавируснай ыарыы өрөспүүбүлүкэҕэ тарҕаныытын саҕаттан бастакы фронугар үлэлиир. Бастакы ыарыһах бу инфекционнай отделениеҕа киирбитэ, билигин кинини кытта үлэлиибит. Биһиги быраастарбыт коронавирус ыарыыны утары үлэ алгоритмын бэрээдэгин суһаллык эрдэ ылсыбыттара. Бу иннинэ биһиги пандемия кэмигэр нэһилиэнньэ эмтээниитин хайдах сөптөөхтүк ыытарга үөрэтиитин ыыппыппыт. Бүгүҥҥү күҥҥэ биһиги улахан уопут хомуйдубут. "Биир Ньыгыл Россия" партия волонтердарыгар Дьокуускайдааҕы клиническэй балыыһа аатыттан махталбын тиэрдэбин", - диэн кылаабынай быраас Николай Васильев бэлиэтээтэ.
Иккис массыынаны Сунтаардааҕы киин балыыһаҕа туттардылар. Икки “Патриот”-УАЗ массыына – бу биһиги быраастарбытыгар пандемия кэмигэр нэһилиэнньэҕэ муҥутуур көмөнү оҥороллоругар бэлэхпит буолар. Медиктэр көһө сылдьар биригээдэлэрин үлэлэрин күүһүрдүөҕэ. Массыыналар Сунтаардааҕы киин уонна Дьокуускайдааҕы клиническэй балыыһаларга бэриллиэҕэ. Пандемия кэннэ массыыналар балыыһаларга хаалыахтара, эбии тырааныспар көрүллүөҕүттэн дьиэҕэ олорор ыарыһахтарга медицинскэй көмө оҥоһуллара элбиэ диэн эрэнэбит", - диэтэ "Биир Ньыгыл Россия" партия регионнааҕы исполкомун салайааччыта Владимир Аммосов.
Бэлиэтээн этэр буоллахха, дойду үрдүнэн «Биир Ньыгыл Россия» волонтердарын кииннэрэ балыыһаларга уонна поликлиникаларга саҥа массыыналары бэлэх биэрэллэр. Нэһилиэнньэҕэ уонна эмчиттэргэ аадырыстаах көмөнү оҥорор сыалтан тырааныспардар партия быыбарын уонна салайар уорган ороскуоттарын аччатыы суотугар атыылаһыллыбыттара билиннэ.
-
0
-
0
-
0
-
0
-
0
-
0
