Дьокуускайдааҕы суһал ыстаап коронавирус ыарыытын утары ыытар үлэлэрин иһинэн куорат иһигэр ыалдьыбыт уонна кинилэри кытта алтыспыт дьон испииһэктэрин туһанарга көҥүл ылыахтара уонна дезинфекция ыытыахтара. Киин куорат баһылыга Сардана Авксентьева коронавируснай инфекциялаах уонна кинилэри кытта алтыспыт сирэйдэр олорор дьиэлэрин подъезтарын дезинфекциялыырга резервнэй фондаттан харчы ыытарга сорудахтаата. Персональнай дааннайдар туһунан федеральнай сокуон ирдэбиллэрин учуоттаан, ыарыһахтар аадырыстара дьиэ подъезтарыгар диэри чуолкайданыахтара уонна Роспотребнадзор ыйбыт сүбэлэринэн санитарнай ыраастааһын үлэлэрэ ыытыллыахтара диэн Дьокуускай к. уопсастыбаннаһы уонна иһитиннэрэр хампаанньалары кытта сибээстэһиигэ департамена иһитиннэрдэ.
Күн ахсын биир кэлим дьуһуурунай-диспетчер сулууспатын линиятыгар киин куорат олохтоохторуттан дезинфекция эбэтэр санитарнай ыраастаныы үлэлэрэ дьиэлэр подъезтарыгар тустаах тэрилтэлэринэн ыытыллыбаттарын туһунан үҥсүүлэр киирэллэр. Кэнники кэмҥэ куорат былаастара 75 дьиэни тутан олорор 22 управляющай хампаанньаларга Роспотребнадзор ыйбыт дезинфекцияҕа сүбэлэрин кэһиитинэн сибээстээн административнай накаастабыл быһаарыытын ылыныыга матырыйааллар хомуллан ыытылыннылар.
Оттон атын регионнарынан ылан көрдөххө дезфинфекция үлэтин ким ыытарый уонна эппиэтинэстээҕий? Холобур, Пенза куоратыгар коронавируснай ыарыы тарҕаныытын утары тэрээһиннэр иһинэн дьиэ подъезтарыгар санитарнай ыраастаныы үлэлэрин ыытыы эбэһээтилистибэлэрэ управляющий хампаанньалларга уонна дьиэ-уот табаарыстыбаларыгар уобаластааҕы губернатор урааҕынан сүктэриллибитэ. Маны даҕатан кыбартыыралаах дьиэ хаһаайыттарыгар эбии ороскуот көрүллүбэт. Дезинфекция, санитарнай ыраастааһын үлэлэрэ дьиэни көрөн-истэн олоруу өҥө оҥоруутун уонна тарыыптарын иһинэн оҥоһуллуохтаах. Волгоград куоратыгар управляющай хампаанньалар үлэһиттэрэ босхо дезинфекция үлэтин киирбит сайаапкаларынан оҥороллоро билиннэ.
Өрөспүүбүлүкэ киин куоратын иһинэн бөдөҥ управляющай хампаанньалара дезинфекцияҕа сыалламыт тэрээһиннэрин ыытыы туһунан отчуоттаабыттара: сөптөөх сириэстибэлэри атыыласпыттар, атыттар анал ыраастыыр тэрилтэлэри сыһыарбыттар. Бэлиэтиир буоллахха, элбэх кыбартыыралаах мас дьиэлэргэ дезинфекция тэрээһиннэрин анал санитарнай ыраастааһын үлэлэрин ыытар тэрилтэлэрэ оҥоруохтаахтар.
Бу ыытыллар үлэлэрин таһынан социальнай ситимнэргэ тустаах үлэлэр сөптөөхтүк ыытыллыбаттарын туһунан кэпсэтиилэр нэһилиэнньэ ортотугар үгүс. Ол курдук, Дьокуускай куорат олохтоохторо харантыыҥҥа олорор ыарыһахтар дьиэлэрин подъездтарыгар суһал дезинфекция үлэлэрэ сөптөөхүк ыытыллыбаттарын туһунан үҥсэллэр.
Санатар буоллахха, «Дьокуускай куорат» куорат уокуругун 2020 с.кулун тутар 20 күнүнээҕи 404р №-дээх дьаһалынан управляющай хампанньаларга элбэх кыбартыыралаах дьиэлэргэ дезинфекция эрэсиимин күүһүрдэллэригэр сорудахтаммыта. Дьиэ хаһаайыттарыгар сыалланан управляющай хампаанньаларга уонна дьиэ-уот табаарыстыбаларыгар подъезтарга ыраастаныы үлэлэр ыытыллыбыт аакталара уонна иһитиннэрии биллэриилэрэ ыйаныахтаахтарын туһунан сорудахтанар. Бу иннинэ куорат баһылыга Сардана Авксентьева сорудаҕынан «Дьокуускай куорат» куорат уокуругар баар элбэх кыбартыыралаах дьиэлэргэ дезинфекция ыытыллыбытын туһунан кэрийэн көрүү үлэлэрэ ыытыллыбыттара.
Болҕойуҥ!
Элбэх кыбартыыралаах дьиэлэргэ управляющай хампаанньалар биитэр дьиэ-уот табаарыстыбалара дезинфекция үлэлэрин ыыппат буоллахтарына Дьокуускай куорат биир кэлим дьуһуурунай-диспетчер сулууспатын 8-(4112) 44-42-29, 44-42-51 төлөппүөн нүөмэрдэригэр эрийэн биллэриэххитин сөп. Маны таһынан СӨ судаарыстыбаннай тутуу уонна дьиэни кэтээн көрөр управлениетыгар 8-(4112) 34-50-53, 34-26-44 төлөппүөн нүөмэрдэринэн, 8-(4112) 34-22-49 факсанан, Адрес электронной почты защищен от спам-ботов. Для просмотра адреса в вашем браузере должен быть включен Javascript.. электроннай почтанан ыйытыктаргытын биэриэххитин сөп.
-
0
-
0
-
0
-
0
-
0
-
0
