Биэдэмистибэ иһитиннэрэринэн, эмсэҕэлэммит дьахтар кыра үлүйүүлээх уонна ыкка ытыттаран олунньу 10 күнүгэр сарсыарда реанимацияҕа киирэн өлбүт. Сүрүн төрүөтэ - бэйдиэ сылдьар дьэллик ыттар ытырыыларыттан быһылаан тахсыбыт. Дьэллик ыттары тутуунан Переславскай-Залесскай куорат сайдыытын «Многофункциональный киин» казеннай тэрилтэтэ дьарыктаныахтааҕа ыйыллар. Ол эрэн, бэрэбиэркэ түмүгүнэн, бэйдиэ сылдьар кыыллары тутууга 2022 сылга хантараак түһэрсиллибэтэҕэ биллибит. Оройуоннааҕы борокуратуура бэрэбиэркэтин түмүгүнэн, матырыйааллары силиэстийэлиир уорганнарга ыытар туһунан уурааҕы таһаарда.
Бу күннэргэ Магаданнааҕы парламентарийдар киһи быраабын өттүнэн кыһалҕаларга болҕомтолорун уурдулар – «Кыылларга эппиэтинэстээх буолуу» сокуоҥҥа ыттар хаһаайыттара эппиэтинэһи сүгүөхтээхтэрин, ону таһынан бэйдиэ сылдьар кыылларга сөптөөх сыһыаны үөскэтиэхтээхтэрин туһунан этиллэр. Ол эрэн, бу ирдэбиллэри кэһии иһин туох да миэрэ ылыллара ыйыллыбатаҕар болҕомтолорун уурдулар. Ол курдук, үөрүнэн бэйдиэ сылдьар кыыллар уулуссаҕа босхо сылдьалларыттан чунуобунньуктар сөптөөх накаастабыл сүгэллэр, ол гынан баран, сүрүн усулуобуйатынан, киһини ыттар ытырбыт төрүөтүгэр эрэ биирдэ чунуобунньук сокуону кэһэн буруйу оҥорооччунан ааҕыллар.
Санатар буоллахха, «Дальнай Восток уонна Забайкалье» парламеннар Ассоциациятын уопсай мунньаҕа олунньу 10 күнүгэр буолан ааста. Мунньахха Ил Түмэн бэрэссэдээтэлэ Алексей Еремеев, тыа сиригэр уонна аграрнай бэлиитикэҕэ сис кэмитиэт бэрэссэдээтэлэ Андрей Находкин кытыннылар.Тэрээһини Приморскай кыраай парламенын бэрэссэдээтэлэ, «Дальнай Восток уонна Забайкалье» парламеннар Ассоциациятын бэрэссэдээтэлэ Александр Ролик салайан ыытта. Норуот дьокутаата Андрей Находкин 498 нүөмэрдээх федеральнай сокуоҥҥа уларытыылары киллэрэр туһунан сокуон бырайыагын билиһиннэрдэ.
Итинэн сибээстээн, Магадан уобаластааҕы дьокутааттара 498 нүөмэрдээх федеральнай сокуоҥҥа уларытыылары киллэрэр туһунан этии киллэрбиттэрин, «Дальнай Восток уонна Забайкалье» парламеннар Ассоциациялара үөрэтэн баран ылынна. Магадаан дьокутааттара этэллэринэн, ыттарга приюттары тутарга федеральнай бүддьүөттэн сөптөөх дотация көрүллүөхтээх. Итиэннэ, хаһаайыттар бэйэ санааларынан эбэтэр эбээһинэс сүктэрэн туран, булгуччу кыылларга маркировка, аттатыы, вакцинация оҥурохтаахтара сокуонунан бигэргэтиллиэхтээх. Маннык миэрэлэр эрэгийиэн таһымыгар эрэ ылыллаллар, холобур, Приморскай кыраайга тустаах сокуон от ыйын 1 күнүттэн үлэлиэҕэ, оттон Саха сиригэр сокуон барылынан «дорожнай каарта» оҥоһуллар.
-
0
-
0
-
0
-
0
-
0
-
0
