Бэлиитикэ

Мунньахха уон эрэгийиэн баһылыктара уонна толоруулаах былаас федеральнай уорганнарын салайааччылара кытталлар.

Бастакынан иһитиннэрэр-сырдатар үлэ боппуруоһа көрүлүннэ. Вице-премьер үрдүк үөрэх кыһаларыгар иитэр үлэҕэ ректоры солбуйааччылар, уопсай үөрэхтээһин орто оскуолаларыгар иитэр үлэҕэ сүбэһиттэр дуоһунастара киллэриллэрин уонна оскуолаларга Арассыыйа былааҕын көтөҕүү үгэһэ сөргүтүллэрин туһунан иһитиннэрдэ.

Эдэр ыччат аармыйаҕа сулууспалыыр интэриэһэ улааппытын бэлиэтээтэ. Донбаһы босхолуур анал байыаннай дьайыыларынан ситимнээн, ыччакка патриотическай үлэни күүһүрдэр наадатын эттэ, ону хонтуруолга ылалларыгар эрэгийиэн баһылыктарыттан көрдөстө.

– Улаатан эрэ обургу оҕолор оборуона, Ийэ дойдуну көмүскээһин туһунан билиэхтэрин баҕалара өйөнүөх тустаах. Онон ДОСААФ, байыаннай-спортивнай лааҕырдар, кулууптар, холбоһуктар үлэлэрин сөргүтэр наада, – диэтэ Юрий Трутнев.

Буолаары турар быыбар хампаанньата тумнуллубата. Уһук Илиҥҥи федеральнай уокурук олохтоохторун баһыйар өттүлэрэ Арассыыйа Бэрэсидьиэнин өйүүллэрэ бэлиэтэннэ. Ол курдук, анал байыаннай эпэрээссийэни нэһилиэнньэ 72 %-а өйүүр, Бэрэсидьиэн Владимир Путиҥҥа  нэһилиэнньэ 81 %-а эрэнэр-итэҕэйэр эбит.

– Биһиги бу эрэллэрин түһэн биэриэ суохтаахпыт. Билигин, арҕаа дойдулар сааҥсыйа биллэрбит, экэниэмикэ өттүнэн ыга сатыыр кэмнэригэр, инвест-бырайыактар, судаарыстыбаннай бырагыраамалар салгыы үлэлииллэрин, уһуйааннары, оскуолалары, балыыһалары тутуу тэтимэ бытаарбатын, дьон-сэргэ олоҕун таһыма мөлтөөбөтүн ситиһиэхтээхпит. Бырабыыталыстыба дойду экэнимиэкэтэ туруктаах буолуутун үрдэтэргэ, нэһилиэнньэни уонна бизнеһи өйүүргэ туһаайыллыбыт дьаһаллары күннэтэ ылынар. Эрэгийиэннэр маннык үлэни эмиэ ыытаҕыт. Дьэ, бу дьаһаллар тустарынан инвестордарга уонна нэһилиэнньэҕэ сөптөөхтүк сырдатан иһиэхтээхпит, Уһук Илин хас биирдии олохтооҕо судаарыстыбаттан туох өйөбүлү, көмөнү ыларын үчүгэйдик билэрин туһугар, – диэн тоһоҕолоон бэлиэтээтэ Юрий Трутнев.

Урукку өттүгэр тастан киллэриллибит бородууксуйаны бэйэ оҥорон таһаарар бородууксуйатынан солбуйууга аһынан-үөлүнэн хааччыллыы улахан быһаарар оруоллаах. Билиҥҥи туругунан Уһук Илиҥҥи федеральнай уокурук эрэгийиэннэрэ оҕуруот аһынан 38 %, этинэн 32 %, үүтүнэн 54 % хааччыналлар.

– Киһи улахан диэбэт сыыппаралара, онон тыа хаһаайыстыбатын сайыннарыыга бары бииргэ ылсан үлэлиирбит эрэйиллэр. Кэккэ эрэгийиэннэргэ бу хайысханан үлэ уопута баар, – диэтэ Уһук Илиҥҥи федеральнай уокурукка боломуочуйалаах бэрэстэбиитэл.

Салгыы Уһук Илиҥҥи эрэгийиэннэргэ ас-үөл ханнык көрүҥнэрин уонна төһөнү оҥорон таһаарар кыах баарын быһаарарга тустаах эрэгийиэннрэтэн элбэх этии киирбитин кэпсээтэ. Онон килиимэт уратытын, суол-иис уустугун, территория киэҥин учуоттаан, Уһук Илиҥҥи эрэгийиэннэргэ тыа хаһаайыстыбатын сайыннарыыга, салааны барыска таһаарарга туһаайыллар өйөбүл ырычаахтара, логистика тиһигэ киин Арассыыйа эрэгийиэннэриттэн арыый атыннык оҥоһулларын туһунан иһитиннэрдэ.