Воинскай кыбаарталга былырыыҥҥыттан саҕаламмыт кэлим тутуллар «Звезднай» микрооройуон өрөспүүбүлүкэҕэ саамай улахан тутуу былаһаакката буолар, 68,5 гектар иэннээх сири хабар. Манна 30 элбэх кыбартыыралаах, 36 блок дьиэлэр, барыта холбоон 11 000 киһиэхэ анаммыт 264 тыһ кв м иэннээх олорор дьиэ-уот тутуллар.
Билигин эбийиэккэ 370 киһи үлэлии сылдьар. Сыл бүтүөр диэри 28,6 тыһ. кв м иэннээх сэттэ элбэх кыбартыыралаах дьиэ үлэҕэ киллэриллиэҕэ. Икки тыһыынча киһи, ол иһигэр хаарбах дьиэлэртэн көһөрүллүбүт 1,9 тыһ киһи кыбаартыыра ылыахтара. Манна кыбартыыралары ыаллар «Уһук Илиҥҥи ипотека», «Чэпчэтиилээх ипотека», «Дьиэ кэргэн ипотеката» бырагыраамаларынан атыылаһаллар.
Тутар-таҥар үлэҕэ биэс бэдэрээдчик тэрилтэ үлэлиир. Дьиэлэр 40-60 %-нара бэлэм буолбут. Кыччаабыта биир ыйга тиийэр матырыйаал саппааһа баар. Онон 2027 сылга диэри 30 элбэх кыбартыыралаах, 36 блок дьиэлэр, 690 оҕо анаммыт икки уһуйаан уонна 1980 оҕоҕо анаммыт икки оскуола уонна поликлиника тутуллуохтара, маҕаһыыннар о.д.а. баар буолуохтара.
Юрий Трутнев болҕомтону өрөспүүбүлүкэҕэ олорор дьиэ 1 кв миэтэрэтин сыанатын аччатарга туһаайда. Ол курдук, Уһук Илини сайыннарыы федеральнай министиэристибэтигэр «Уһук Илиҥҥи кыбартаал» ырычааҕы туһанан «Звезднайга» квадратнай миэстэ сыанатын түһэрэр суолу тобуларга сорудахтаата.
– Биир квадратнай миэтэрэҕэ 130 тыһыынча солкуобай диэн үрдүк. Саха сирин, уопсайынан Уһук Илин эрэгийиэннэрин сөптөөх сыаналаах олорор дьиэнэн хааччыйыахха наада, – диэтэ Юрий Трутнев.
Уһук Илини сайыннарыы федеральнай министиэристибэтэ «Уһук Илиҥҥи кыбартаал» бырагыраамманы сөптөөх сыанаҕа хаачыстыбалаах дьиэлэри кэлим тутарга анаан оҥорбута. Тутааччы квадратнай миэтэрэ сыанатын кыччатарын иһин, сир киниэхэ босхо бэриллэр. «Уһук Илиҥҥи ипотека» чэрчитинэн, баан кирэдиитэ сылга 2 %-наах ыстаапканан бэриллэр, бу чэпчэтиинэн туһанар доруобуйа харыстабылын уонна үөрэхтээһин судаарыстыбаннай, муниципальнай тэрилтэлэрин үлэһиттэрин кэрискэтэ сааһыттан, дьиэтээҕи балаһыанньатыттан тутулуга суох кэҥэтиллибитэ.
-
2
-
0
-
0
-
0
-
0
-
0
