Бэлиэтээн эттэххэ, бу сүбэ мунньахха дойду бары, 89 эрэгийиэнин, сокуону оҥорон таһаарар уорганнара видеокэмпириэнсийэ нөҥүө холбонон үлэлээтилэр.
Дакылааты Госдума вице-спикерэ, Украинаҕа биологическай лабораториялар үлэлэрин силиэстийэлиир парламент хамыыһыйатын хос бэрэссэдээтэлэ Ирина Яровая оҥордо.
- Ирина Яровая АХШ былаастара уонна байыаннайдара бэлэмнээбит уодаһыннаах бырайыактарын дьиҥнээх чахчыларга олоҕуран, сиһилии сырдатта. Украина сириигэр-уотугар нэһилиэнньэ ахсаанын салайарга туһуламмыт ынырыктаах бырагыраама оҥоһуллубутун туоһулуур докумуоннар ааспыт сыл устатыгар арыллыбыттара. Ол – Украина биологическай оккупациялааһынын былаана буолар. 50 лаборатория тэриллибит, үгүс элбэх биологическай сэп-сэбиргэл көрүҥэ туһаныллыбыт. Украинаҕа 1993-1998 сыллар усталарыгар бу ынырыктаах бырагырааманы олоххо киллэрии боппуруостарыгар научнай-тиэхэниичэскэй киин тэриллибит, – диэн Виктор Губарев дакылаат кэнниттэн ыытыллыбыт дьүүллэһии түмүгүнэн бэлиэтээтэ.
2005 сыллаахха Украинатааҕы доруобуйа харыстабылын министиэристибэтэ Пентагоны кытта кистэлэҥ сөбүлэһиини түһэрсибит. Бу сөбүлэһиигэ туох туһунан этиллибитин сэрэйиэххэ сөбүн туһунан Ирина Яровая дакылаатыгар бэлиэтээбит. Салгыы, UP бырайыак чэрчитинэн, биологическай сэрии сэбин бэрэбиэркэлииргэ Украинатааҕы байыаннай сулууспалаахтарга уопуттар ыытыллыбыттарын кэпсээбит.
– Украинаҕа Арассыыйаны, кини гражданнарын утары биологическай сэрии бэлэмнэммитэ дакаастаммыт. Луганскай народнай өрөспүүбүлүкэ биир оскуолатыгар Азия сэллигэр ыалдьыы түбэлтэтэ бэлиэтэммит. Маны эмиэ сыстыганнаах ыарыыны былааннаахтык тарҕатыы быһыытынан ааҕар сиэрдээх, – диэн Виктор Губарев эттэ.
Парламент хамыыһыйатын дакылаатын Госдума дьокутааттара биир санаанан өйөөбүттэр уонна тустаах уурааҕы ылыммыттар.
– Аан дойду бүттүүнэ бу дакылааты уонна чинчийии түмүгүн билсиэхтээх, Украинаҕа биологическай сэрии сэбин оҥоруу былааннарын булгуччу утарсыахтаах, маннык сэрии сэбин бэрэбиэркэлээһини уонна туһанары төрдүттэн бопсор туһунан дьаһал үрдүкү таһымҥа ылыллыахтаах, – диэн Ил Түмэн вице-спикерэ Вкитор Губарев бэлиэтээтэ.
Ирина Яровая дакылаатыттан: «Оборуона министиэристибэтин исписэлиистэрин хамыыһыйатын көмөтүнэн эмтэниини ааһар Украина байыаннай сулууспалаахтарыттан хаан анаалыһыгар 180 боруоба ылыллан, чинчийиигэ ыытыллыбыт. Анаалыс түмүгэ байыаннай сулууспалаахтар 30 %-нара гепатитынан ыалдьыбыттарын эбэтэр ыарытыйалларын, 14 %-нара Конго-Крым лихорадкатыгар, онтон 21 %-нара Арҕаа Нил лихорадкатыгар хаптарбыттарын көрдөрбүт».
-
0
-
0
-
0
-
0
-
0
-
0
