Дьиҥэр, куоластааһын сүрүн биир күнэ – от ыйын 1 чыыһылата. Ол эрээри дьаҥ тарҕаныытын хааччахтыыр сыалтан, элбэх киһини мунньубат туһуттан, куоластааһыны нэдиэлэ устата ыытарга быһаарыныыны ылыммыттара.
Иван Андросов, Саха сиринээҕи Киин быыбардыыр хамыыһыйа бэрэссэдээтэлин солбуйааччы:
--Бүгүн өрөспүүбүлүкэ үрдүнэн барыта 816 куоластыыр учаастак аанын арыйда. Итинтэн 791 учаастага -- олохтоох, 25 – быстах кэмнээх. Быстах кэмнээхтэри вахтанан үлэлии сылдьааччыларга, байыаннай чааска, полярниктарга, интэринээт дьиэлэригэр анаан арыйдыбыт.
Бары учаастактары ыарыыттан харыстыыр мааскаларынан, бэрчээккилэринэн, халааттарынан, санитайзердарынан, тепловизордарынан, анал экраннарынан, биирдэ туттуллар уруучукаларынан хааччыйдыбыт. Бэйэ-бэйэлэриттэн 1,5 миэтэрэ тэйиччи туралларын ыйар бэлиэлэр оҥоһуллубуттара. Учаастакка 12-тэн элбэх киһини киллэрбэттэр. Куоластаан бүтэн баран, атын аанынан тахсар буолуохтара.
Коронавирустан сэрэхэчийэн, дьиэҕэ куоластааччы элбэх. Бүгүҥҥү туругунан 15 636 сайабылыанньа киирбит. Балар бэйэлэрин учаастактарын кытта кэпсэтэн баран, кинилэргэ хаһан табыгастааҕынан ыҥырыахтара. Ол эрээри учаастак үлэлиир эрэ кэмигэр. Үлэ чааһын кэнниттэн эҥин буолбатах.
Киин хамыыһыйа уурааҕа бүгүн кэллэ. Онно этиллэринэн, учаастактар аны мантан ыла сарсыарда 8-тан киэһэ 20.00 чааска диэри үлэлиир буолуохтара.
Куһаҕан суоллаах-иистээх сирдэргэ олорооччуларга (ыстаадаҕа сылдьар табаһыттарга, ыраах сылгы базаларыгар, күнү-дьылы кэтээн көрөөччүлэргэ, уо.д.а.) куоластааһын бэс ыйын 10 күнүттэн саҕаламмыта. Барыта 8000 кэриҥэ киһи болдьоҕун иннинэ куоластыахтаах. Билиҥҥитэ 2436 киһи куоластаата. От ыйыгар диэри бириэмэ элбэх, онон 28 улууска баар куһаҕан суоллаах-иистээх сирдэри барытын хабыахпыт.
Куоластыыр нэдиэлэҕэ дьиэлэригэр суох буолар дьон атын сиргэ куоластыырга сайабылыанньа биэрэллэр. Бүгүҥҥү туругунан 10342 киһиттэн оннук сайабылыанньа киирдэ.
Электроннай куоластааһын диэн биһиэхэ суох. Москваҕа уонна Нижнэй Новгородка эрэ баар. Онон бука бары сыһыарыллыбыт учаастактаргытыгар тиийэн, биитэр дьиэҕитигэр ыҥыртаран, Конституцияҕа киирэр көннөрүүлэри утарар да, сөпсөһөр да буоллаххытына куоластаан, бэйэҕит гражданскай иэскитин толоруҥ. Куоластаабыт киһи улахан аҥаара утарбыт буоллаҕына, ити уларыйыылар киирбэттэр. Эбэтэр улахан аҥаара сөпсөспүт буоллаҕына, көннөрүүлэри ылыналлар. Онон хас биирдиигит куолаһа инникибитин быһаарар эппиэтинэстээх түгэҥҥэ олус суолталаах.
Учаастаккытын билбэт буоллаххытына, http://www.yakut.izbirkom.ru сыылканан киирэн, «Найди свой участок» диэни көрүҥ. Эбэтэр 40-88-85 төлөпүөҥҥэ эрийэн билсиҥ.
-
0
-
0
-
0
-
0
-
0
-
0
