Издательский дом Редакция Подписка
Погода в Якутске: . -12 oC

Өксөкүлээх Өлөксөй аатынан норуот айымньытын киинигэр ыам ыйын 18 күнүгэр Ил Түмэн 6-с ыҥырыылаах мунньаҕын дьокутаата, “Ил Түмэн” бэчээт дьиэтин генеральнай дириэктэрэ, “Ситим” медиа-бөлөх уонна “Кыым” норуот хаһыатын тэрийээччитэ Мария Николаевна Христофорова 5 сыллааҕы үлэтин үтүө түмүгүн бар дьонугар билиһиннэрэр отчуота буолан ааста.

Төһө даҕаны уот баран саала им балай хараҥаҕа куустарбытын, микрофон үлэлээбэтин үрдүнэн, отчуокка кэлбит дьон тарҕаспакка, хата төттөрүтүн Мария Николаевнаны өйүүллэрин, хайа баҕарар түгэҥҥэ кини аттыгар баар буолалларын биллэрдилэр.

Өксөкүлээх Өлөксөй аатынан норуот айымньытын киинигэр ыам ыйын 18 күнүгэр Ил Түмэн 6-с ыҥырыылаах мунньаҕын дьокутаата, “Ил Түмэн” бэчээт дьиэтин генеральнай дириэктэрэ, “Ситим” медиа-бөлөх уонна “Кыым” норуот хаһыатын тэрийээччитэ Мария Николаевна Христофорова 5 сыллааҕы үлэтин үтүө түмүгүн бар дьонугар билиһиннэрэр отчуота буолан ааста.

Төһө даҕаны уот баран саала им балай хараҥаҕа куустарбытын, микрофон үлэлээбэтин үрдүнэн, отчуокка кэлбит дьон тарҕаспакка, хата төттөрүтүн Мария Николаевнаны өйүүллэрин, хайа баҕарар түгэҥҥэ кини аттыгар баар буолалларын биллэрдилэр.

Онон тэрээһин бэрт истиҥ-иһирэх, сахалыы сайаҕас тыыҥҥа иккис этээскэ фойеҕа ыытылынна. Күөх хонуу кытылыгар түөлбэлээн олорор “Набережнай” уокурук олохтоохторо көхтөөхтөрүн, дьокутааттарын тула түмсүүлээхтэрин көрдөрдүлэр. 

30-тан тахса сокуон барылын көҕүлээччи

Мария Николаевна норуот талбыт дьокутаата буоларын быһыытынан, үлэтэ-хамнаһа аҥаардас Дьокуускай куорат иһинэн муҥурдаммат. Кини бу ааспыт 5 сыл иһигэр дьон-сэргэ олоҕо тупсарын, сокуоннар кэм ирдэбилигэр эппиэттиилэрин туһугар тус бэйэтэ уонна биир идэлээхтэрин кытта 30-тан тахса сокуон барылын көҕүлээн киллэрбитэ. Ол иһигэр, “сэрии оҕолорун туһунан”, “тыа сирин дьонугар-сэргэтигэр уматык сыаната чэпчиирин туруорсар сокуону”, “элбэх дьон олорор дьиэлэрин таһыгар итирдэр утаҕы атыылыыр сымыйа кафелар тустарынан”, “уһун үйэлэниигэ сыһыаннааҕы”, о.д.а.

Үгүс дьон кинини Сэбиэскэй кэм ньиргийэн ааспытын кэннэ умнулла сыспыт, уота өспүт «Кыым» хаһыаты сөргүтэн, чоҕун күөдьүтэн, иккис тыын киллэрэн, Сахабыт Сирин хас биирдии муннугар саха дьоно сөбүлээн ааҕар хаһыатын сайыннаран таһаарбыт, “Ситим” медиа-бөлөҕү тэрийбит талааннаах салайааччы быһыытынан билэллэр. Мария Николаевна сүүрбэттэн тахса сыл суруналыыстыка эйгэтигэр таһаарыылаахтык үлэлии сылдьар.  

Кини “Молодежь Якутии” хаһыаты сөргүтэн, «Күрүлгэн», «Байдам», «Хатан» сурунааллары бэчээттээн, аныгы олоҕу кытта тэҥҥэ хардыылаан, хаһыаттар куйаар ситимигэр сетевой таһаарыыларын оҥорон, “Ситим” медиа-бөлөх Уһук Илин эрэ буолбакка, бүтүн Арассыыйа үрдүнэн биллэр буолла.

Ону таһынан, Сахабыт Сирин парламенын сонуннарын бастакынан сырдатар, нэһилиэнньэ олоҕун таһымын тупсарарга туох-ханнык үлэ ыытылларын кэпсиир «Ил Түмэн» Издательскай дьиэни салайар.

Ылбаҕай ырыа аргыстаах

Оскуола дириэктирдэрэ, тэрилтэ тутаах үлэһиттэрэ, уопсастыбаннас актыбыыстара Мария Николаевнаҕа махтанан туран, Набережнай уокурук олохтоохторун күннээҕи кыһалҕаларын быһаарарга, дьон олороругар табыгастаах эйгэни тэрийэргэ кини хайдах көмөлөспүтүн туһунан кэпсээтилэр. Кинилэр үгүстэрэ ырыа аргыстаах, үҥкүү-битии кэһиилээх кэлбиттэр.  

Дьоро киэһэни саха эстрадатын чаҕылхай сулустара: Александр Бурнашев, Сиэйэ уола, Анастасия Готовцева, аан дойду вертуоз-хомусчута, аар-саарга аатырбыт “Айархаан” бөлөх төрүттээччитэ Альбина Дегтярева о.д.а. киэргэттилэр.

Мария Николаевна куоракка саха эйгэтин кэҥэтэргэ, хас биирдии уһуйаан аайы тарҕатарга хас да сыл тухары утумнаах үлэни ыытар. 2011 сыллаахтан Саха Сиригэр барыта хас даҕаны Гиннесс рекорда олохтоммута. Ол иһигэр, Хомус, Оһуокай, Кымыс, Төрүт таҥас рекорда. Бу барыта Мария Николаевна быһаччы кыттыытынан, тэрээһинэн тэриллибиттэрэ.

Инники күөҥҥэ сирдээччи

«Кини дьокутаат буолуон да инниттэн норуотун туһугар туох эрэ үтүөнү аҕалларбын диэн ис сүрэҕиттэн кыһаллан туран үлэлиир киһи. Үлэтигэр бэриниилээх уонна эппиэтинэстээх. Быыбарга ылыммыт бырагырааматын толорорго, дьон олоҕун чэпчэтэргэ күүскэ дьаныһан хамаандатын кытта үлэлиир.

Саха омук инники кэскилэ оҕо төрөөбүт тылынан саҥарарыттан, ийэ тыл сылаас тыыныгар иитиллэриттэн улахан тутулуктаах. Төрөппүт итиниэхэ болҕомто ууран, бириэмэтин харыстаабакка оҕотун уһуйдаҕына, кинини кытта кэпсэттэҕинэ, бииргэ дьарыктаннаҕына биирдэ оҕо кэбэҕэстик ылынар. Билигин хомойуох иһин, үгүс ыаллар ипотека, кирэдьиит ылан баран хас да үлэҕэ үлэлииллэр, оҕолоро хайдах улаатарын да билбэккэ хаалаллар.

Күн аайы дьарыктаммат буоллаххына, дьаалатынан устар, онон аныгы оҕолор төлөпүөнүнэн араас ролигы көрөн, омук тыыныгар уһуйуллан, хараҥа эйгэҕэ киирэн хаалыахтарын сөп. Бастакы кылааска киирэр оҕолортон 30% эрэ сахалыы билэр, 5-10% олох да билбэт.

Оҕо төрөөбүт тылынан үөрэнэр быраабын туруулаһан, “Айыы кыһатын” арыйарбытыгар гимназия эркинэ сахалыы буоларыгар Мария Николаевна көмөлөспүтэ. «Газэнергомонтаж» салалтатын кытта кэпсэтэрбитигэр биһигини кытта бииргэ барсан, ылыннарыылаах тылынан-өһүнэн туруорсубута. Кини туохтан да толлубакка кимиилээхтик киирсэр, ол туруорсубутун тиһэҕэр диэри тиэрдэр локомотив курдук үтүө хаачыстыбалаах.

Салалта, дьокутааттар бары бииргэ үлэлээтэхпитинэ, омукпут кэскилин туһугар сомоҕолостохпутуна үтүө түмүк тахсыаҕа.  Бэйэ-бэйэбитин буруйдаһа сырыттахпытына сайдыы тахсыбат. Мария Николаевна харса суох майгылаах, инники күөҥҥэ сирдээччи, көҕүлээччи, тэрийээччи, оннук дьону биһиги харыстыахтаахпыт.

Төһөнөн кини курдук киһи элбэх, оччонон норуот күүстээх буолар. Дьон куһаҕанын була сатыы-сатыы хостообокко, туох эрэ табыллыбатаҕына буруйдааҕы көрдөөбөккө, саха дьоно Айыы санаатынан салайтаран, олоххо сырдык өрүтүн көрөн, үтүөнү үксэтэ сылдьыахтаахпыт», — диэн “Айыы кыһата” национальнай гимназия дириэктэрэ, Арассыыйа Федерациятын үтүөлээх учуутала, Учууталлар учууталлара Лидия Петровна Шамаева ыллыктаах сайдам санаатын үллэһиннэ.

Өрүс флотун үлэһиттэрэ дьокутаат үлэтин биһирииллэр

Надежда Звягинцева, ыччат бэлиитикэтигэр уонна иитэр-такайар үлэҕэ Уу тырааныспарын институтун дириэктэрин  солбуйааччытын эбээһинэһин толорооччу дьокутаат диэтэххэ, Мария Николаевна, дьону кытта кэпсэтэригэр боростуойун, көрдөстөххө, кыаҕа баарынан куруук көмөлөһөрүн бэлиэтээтэ.

«Көрдөспүппүт тухары биирдэ даҕаны аккаастаабатаҕа, институт ыытар тэрээһиннэригэр өрүү көхтөөхтүк кыттан, туйгун үөрэхтээх устудьуоннары наҕараадалааччы. Олохторун өрүс флотугар анаабыт, өр кэмҥэ ыччаты уһуйбут бэтэрээннэрбитигэр доруобуйаларын чөлүгэр түһэрэллэригэр санаторийга путевка бэлэхтээбитэ.

Аҕа дойдуну көмүскүүр сэриигэ, Афганистаҥҥа, Чечняҕа, Украинаҕа анал байыаннай дьайыыга сылдьыбыт, өстөөҕү самнарарга хорсуннарын көрдөрбүт өрүс тырааныспарын үлэһиттэрин албан ааттарын үйэтитэргэ Дьоруойдар аллеяларын арыйарбытыгар Мария Николаевна үп-харчы өттүнэн күүс-көмө буолбута. Онон кини үлэтин биһиги кэлэктиип үрдүктүк сыаналыыбыт», — диэтэ  Надежда Звягинцева.

Дорҕоонноох оһуохай

Отчуот түмүгэр Мария Христофорова уокурук көхтөөх, бастыҥ үлэлээх дьонугар, чуолаан Ольга Алексееваҕа, «Солнечный берег» ТСЖ, 202 түөлбэ старосталарын сүбэтин бэрэссэдээтэлигэр Ил Түмэн Бочуоттаах грамотатын туттарда. Губинскай уокурук бэтэрээннэрэ, 2 №-дээх Оҕо ускуустубатын оскуолатын үлэһиттэрэ, «Золотая рыбка» оҕо саадын иитээччилэрэ о.д.а. «Дьокуускай 390 сыла» диэн бэлиэнэн наҕараадаланнылар.  

«Бу киэһэ мустубут дьоҥҥо бука барыгытыгар махтанабын, туох да буолбутун иһин, эһиги миэхэ эрэниэххитин сөп. Билигин кимиэхэ даҕаны чэпчэкитэ суох, дойду үрдүнэн уустук кэм бүрүүкээтэ. Бүгүн баар моһоллору этэҥҥэ туораан, тэрээһиммитин син биир ыыттыбыт. Хайа баҕарар балаһыанньаҕа санааҕын түһэрбэккэ туруоруммут сыалгын ситиһэн, суолу иннин хоту барар, үлэтигэр бэриниилээх киһи кыайар», — диэн Мария Николаевна түмүк санаатын эппитин дохсун ытыс тыаһынан доҕуһуоллаатылар.

«Дьокутаат дневнигэ» диэн телеграм-ханаалга суруттарбыт дьон бириистээх лотереяҕа кыттан, бэлэх сүүйэн, үөрүүлэрэ өссө үрдээтэ. Отчуот бүтэн эрдэҕинэ уоту оҕо оонньуурун курдук араара-араара холбообуттарын иһин, ураты усулуобуйаҕа ааспыт тэрээһин бар дьон төгүрүччү туран, дорҕоонноох оһуохайынан түмүктэннэ.

  • 2
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением
Лента новостей

Суоппар буолар уустугурда

Муус устар 1 күнүттэн байаҥкамаат бэбиэскэтиттэн куотунар дьону тырааныспары ыытар…
28.03.24 17:19
Лента новостей

Интерактивнай быыстапка

«Арассыыйа – Мин устуоруйам» мультимедийнай устуоруйа пааркатыгар кулун тутар 20 күнүттэн…
28.03.24 16:23