«Биһиги оскуолабыт Борис Горбатюк аатын сүгэр, кини үөрэх салаатыгар 52 сыл үлэлээбитэ. Алданнааҕы оскуола-интэринээт дириэктэрэ, Саха АССР просвещениеҕа миниистирэ, куорат Уопсастыбаннай балаататын бастакы бэрэссэдээтэлэ этэ. Итиэннэ Дьокуускай 15 №-дээх оскуолатыгар 30 сыл устата дириэктэрдээбитэ.
Оскуолабыт Бестужев-Марлинскай аатынан уулусса 24 №-гэр турар, манна уулаах намыһах сир буолан, оскуола дьиэтэ хамсаан, эркинэ хайа баран, түннүктэрэ ханньары түһэн, сыбаайатын бөҕөргөтөргө, хапытаалынай өрөмүөн ыытарга 10,5 мөл. солк. наада буолбута. Оччолорго Дьокуускай баһылыга Сардаана Авксентьева этэ. Үп-харчы сороҕун куорат дьаһалтата биэрбитэ, биһиги «Главстрой» тэрилтэҕэ, Ил Түмэҥҥэ тиийэ өрөмүөн харчытын туруорсубуппут. Үбүлээһин харчытын буларга Мария Николаевна улаханнык көмөлөспүтэ, биһигини кытта тэбис-тэҥҥэ үгүстүк сүүрбүтэ-көппүтэ, онон махталбыт муҥура суох», — диэн этэр Светлана Горбатюк.
«Ону таһынан, Санкт-Петербург куоракка «Арассыыйа 100 бастыҥ оскуолата» куонкуруска кытта барарбытыгар Мария Николаевна айаммыт ороскуотун үбүлээбитэ. Күрэх түмүгүнэн, биһиги оскуолабыт лауреат аатын ылан, инновационнай технологияны киллэрэргэ дойду бастыҥ оскуолаларын ахсааныгар киирбитэ», — диир оскуола дириэктэрэ.
Ити курдук Набережнай уокуруктан үгүс тэрилтэ салайааччылара кэлэн, Мария Николаевнаҕа махтанан туран, дьокутаат үлэтин үрдүктүк сыаналыылларын биллэрдилэр.
-
0
-
0
-
0
-
0
-
1
-
0
