Ил Түмэн бүддьүөккэ, үпкэ-харчыга, нолуок уонна сыана бэлиитикэтигэр сис кэмитиэт бэрэссэдээтэлэ Юрий Николаев Дьокуускай куорат 4 №-дээх университет бөлөҕөр 812 куолаһы ылан, иккис миэстэни ылла. Дьокуускай куорат Дууматын 30 саастаах эдэр дьокутаата, ХИФУ Устудьуоннарын куоратын дириэктэрэ Степан Павлов 1393 куолаһы ылан, бастакы миэстэҕэ таҕыста.
8 №-дээх Набережнай бөлөххө биэс хандьыдаат киирсибититтэн Николай Бугаев, Емельян Ярославскай аатынан мусуой дириэктэрэ 1314 куолаһы ылан, кыайда. Ил Түмэн вице-спикерэ Антонина Григорьева 1212 куолаһы ылан, тилэх баттаһа иккис миэстэҕэ таҕыста.
Үөһээ Бүлүү-Горнай бөлөҕөр «Якутскэнерго» ПАО Киин уот ситимнэрин филиалын дириэктэрэ Петр Иванов, 2195 куолаһы ылан, эрэллээхтик кыайда. Ил Түмэн наукаҕа, үөрэххэ, култуураҕа, көрдөрөр-иһитиннэрэр эйгэҕэ уонна уопсастыбаннай түмсүүлэр дьыалаларыгар сис кэмитиэт бэрэссэдээтэлэ Феодосия Габышева 1876 куолаһы ылан, үһүс миэстэҕэ тигистэ. Ол оннугар кини биир мандааттаах уокурукка 2744 куолаһы ылан, Спиридон Борбуевы түөрт куолаһынан кыайда.
Дьокуускай куорат Дууматын барыллаан куоластааһыныгар 1 №-дээх Пригороднай биир мандааттаах уокурукка Алексей Осипов, «Ситим» Хатастааҕы норуот уус-уран айымньытын дьиэтин дириэктэрин солбуйааччыта 1448 куолаһы ылан, эрэллээхтик кыайда. Оттон Дьокуускай куорат Дууматын бэрэссэдээтэлэ Альберт Семенов ырааҕынан хаалан, бэлиитикэҕэ саҥа тахсан эрэр дьоҥҥо кыайтарда.
Онон Дьокуускай куорат Дууматын спикера аны күһүн уларыйыан сөп. Кини дуоһунаһын барыллаан куоластааһыҥҥа 1376 куолаһы ылбыт МКУ «СЭГХ» дириэктэрэ Владимир Аммосов, эбэтэр 710 быыбардааччы куолаһын ылбыт СӨ ГУП ЖКХ «Коммункомплектация» филиалын дириэктэрэ Андрей Лебедев ылыахтарын сөп диэн сылыктыыллар.
«Биир ньыгыл Арассыыйа» эрэгийиэннээҕи салаатын салайааччыта Руслан Платонов: «Барыллаан куоластааһыҥҥа кыайтарбыт дьон күһүҥҥү быыбарга бэйэлэрин кандидатураларын туруорунуохтарын сөп эрээри, баартыйа өйөбүлэ суох киирсиэхтэрэ» диэн эппитэ.
Хаартыска: «Биир ньыгыл Арассыыйа» саайтыттан
-
0
-
0
-
0
-
0
-
0
-
0
