Үөрүүлээх түгэҥҥэ Саха Өрөспүүбүлүкэтин Ил Дарханын Айсен Николаев эҕэрдэтин ааҕан иһитиннэрдилэр. Өрөспүүбүлүкэ баһылыга бары үлэһиттэри үбүлүөйдээх бэлиэ түгэнинэн эҕэрдэлээн туран, инникитин сыыппаралааһыҥҥа уонна үрдүк технологиялары сайыннарыыга элбэх үлэ күүтэрин бэлиэтээтэ. “Сыыппаралааһын гражданнар олохторун табыгастаах оҥорор. Итиэннэ өрөспүүбүлүкэ экэниэмикэтин сайдыытын көҕүлүүр”, – диэн Айсен Сергеевич суруйбут.
Бэлиэ күҥҥэ СӨ Ил Дарханын уонна Бырабыыталыстыбатын дьаһалтатын салайааччы Афанасий Владимиров бэйэтин эҕэрдэтин эттэ. Кини өрөспүүбүлүкэҕэ сибээс сайдыытыгар улахан кылааттарын Александр Ильич Борисов уонна Владимир Михайлович Членов киллэрбиттэрэ диэн ахтан аһарда. “Билигин Саха сирэ сыыппаралааһын көхтөөх түһүмэҕэр киирдэ. Сибээс олохпут-дьаһахпыт бары көрүҥүн хабар буолла. Ол түмүгэр ыраах да сытар улуустар уонна нэһилиэктэр олохтоохторо кэми кытта тэҥҥэ хардыылыыр уонна сайдар кыахтаннылар”, – диэн Афанасий Семенович сиэрдээхтик бэлиэтээтэ.
Тэрээһин кэмигэр Афанасий Владимиров сибээс үлэһиттэригэр Арассыыйа Федерациятын уонна Саха Өрөспүүбүлүкэтин наҕараадаларын туттарда.
Саха Өрөспүүбүлүкэтин Инновацияҕа, сыыппара сайдыытыгар уонна инфокоммуникационнай технологияларга миниистирэ Анатолий Семенов РФ Бэрэсидьиэнин Махтал суругун тутта.
“Гражданскай килбиэн” бэлиэнэн СӨ Инновацияҕа, сыыппара сайдыытыгар уонна инфокоммуникационнай технологияларга министиэристибэтин тутаах испэсэлииһэ Мирослав Борисов, “Саха” ВГТРК-ГТРК араадьыйаҕа сулууспатын начаалынньыга Иннокентий Киренскай наҕараадаланнылар.
Саха Өрөспүүбүлүкэтин П.И. Дудкин аатынан судаарыстыбаннай бириэмийэтин Дьокуускайдааҕы сибээс колледжын уһуйааччыта Валентин Киселев ылла.
Н.А. Кондаков аатынан Ил Дархан бириэмийэтин “Саха” НКИХ айар бөлөҕөр: Наталья Михалеваҕа уонна Нина Корниловаҕа туттардылар.
Ил Дархан Махтал суруктарынан СӨ Инновацияҕа, сыыппара сайдыытыгар уонна инфокоммуникационнай технологияларга миниистирин солбуйааччы Петр Николаев, үпкэ салалтатын салайааччыта Арина Романова наҕараадаланнылар.
Ил Дархан кыраамататынан СӨ Инновацияҕа, сыыппара сайдыытыгар уонна инфокоммуникационнай технологияларга министиэристибэтин салалтатын салайааччыта Дмитрий Васильев уонна “Мегафон” эрэгийиэннээҕи салалтатын дириэктэрэ Наталия Ящук бэлиэтэннилэр.
СӨ Бырабыыталыстыбатын Бэрэссэдээтэлин Махтал суругун СӨ Инновацияҕа, сыыппара сайдыытыгар уонна инфокоммуникационнай технологияларга министиэристибэтин тутаах испэсэлииһэ Радмила Яковлева ылла.
СӨ Ил Дарханын уонна Бырабыыталыстыбатын пресс-сулууспатын матырыйаалынан.
Мария Васильева хаартыскаҕа түһэриилэрэ.
-
0
-
0
-
0
-
0
-
0
-
0
