Оннук кый ыраахпыт биһиги кинилэртэн – санаалара да тиийбэт дойдуларыгар олоробут. Манна барыта ыарахан: усулуобуйа даҕаны, сыана даҕаны, олох даҕаны. Ол иһин кэнники кэмҥэ күргүөмүнэн көһүү улаатта. Ол түмүгэр Уһук Илин нэһилиэнньэтин ахсаана, сэбиэскэй кэми кытта тэҥнээтэххэ, икки төгүл аччаата. Оттон тэнийэн-тарҕанан олорор сирбит иэнэ уларыйбат – уруккутун курдук киэҥ нэлэмэн. Ону хайдах туһаҕа таһаарабыт? Дьону хайдах олохсутабыт? Балысхан тэтимнээх миграцияны хайдах гынан тохтотобут? Олох таһымын хайдах үрдэтэбит?
Ити ыйытыылар үрдүкү салалтабытын үүйэ-хаайа туппуттара быданнаата. Араас ньыманы, мэхэньиисими тобула сатыыллар. Оннооҕор анаан-минээн РФ Уһук Илини уонна Аартыканы сайыннарыыга министиэристибэтин тэрийбиттэрэ. Ол эрээри ыччат 2 %-наах ипотекаттан да, Уһук Илин гектартан да, о.д.а. чэпчэтиилэртэн да соччо тутуллубат – син биир бара тураллар. Онон саҥа өйөбүллэри толкуйдуурга күһэллэллэр.
Ол курдук, ааһан эрэр нэдиэлэҕэ дойду аҕа баһылыга Владимир Путин бу күһүн Владивостокка буолбут Уһук Илиҥҥи экэнэмиичэскэй форум түмүгүнэн РФ Бырабыыталыстыбатыгар кэккэ боппуруостары көрөллөрүгэр сорудах биэрдэ. Олортон Саха сиригэр сыһыаннаахтарын билиһиннэрэбит
- Уһук Илин олорор дьиэ кэргэҥҥэ үһүс (онтон салгыы) оҕо төрөөтөҕүнэ, 1 мөлүйүөн суумалаах “ийэ хапытаалын” аныырга;
- Авиа-билиэт сыанатын субсидиялыырга эбии үп буларга;
- Уһук Илин уокуругар 5 сылтан уһуннук үлэлээбит эмчиттэргэ (быраас эрэ диэн чопчулаабатах, медиктэр диэбит) уонна уһуйааччыларга (учууталга эрэ диэн туһаайбатах, педагогтарга барыларыгар быһыылаах) чэпчэтиилэх ипотека бырагырааматын үлэлэтэргэ;
- Федеральнай бас билиигэ баар сирдэри хаһаайыстыбаҕа туһанар, кэлин онно дьиэ туттар быраабы биэрэргэ;
- Уһук Илин ипотеката киириэҕиттэн үүнэ-тэһиинэ суох үрдээбит “первичнэй” кыбартыыралар сыаналарын түһэрэргэ.
Бу сыл бүтүөр диэри ити этиилэригэр бырайыактары күүтэрин эттэ. Онон эһиил 2022 сылтан Уһук Илин олохтоохторо баһаам көмөнү көһүтэбит.
-
0
-
0
-
0
-
0
-
0
-
0
