Үөрэх кыһатыгар
Бу күннэргэ Н.П. Огарев аатынан Мордуобуйа судаарыстыбаннай үнүбүрсүтүөтүн ректорын эбээһинэһин толорооччу Дмитрий Глушко, биир дойдулааҕын Айдар Дмитриеви үлэҕэ ыҥырда.
Айдар Аксентьевич саҥа сиригэр анаммыт дуоһунаһынан – куттал суох буолуутун хааччыйыыга уонна хаһаайыстыбаны салайыыга ректоры солбуйааччынан буолла.
Айдар Дмитриев саҥа үлэтигэр ананаат, Инстаграмын сирэйигэр бэйэтин туһунан билиһиннэрдэ. Ол курдук, кини Дьокуускай куоракка төрөөбүтүн туһунан суруйар. Ол эрээри кини бу суруйуутугар сиһилии бэйэтин туһунан кэпсээбэккэ, лоп-бааччы аҕыйах тылынан арыллар. Айдар Аксентьевич туһунан сиһилии билээри Интернет эйгэтин өҥөс гыммытым, бу саҥа үлэтигэр тиийиэр диэри олоҕун айана маннык буолла:
1981 сыллаахха тохсунньу 7 күнүгэр Дьокуускай куоракка төрөөбүт;
2003 сыллаахха Арассыыйа ФСБ акадьыамыйатын бүтэрбит, “юрист” идэтин ылбыт;
1998-2019 сылларга, биэнсийэҕэ тахсыар диэри, хантараагынан ФСБ уорганнарыгар үлэлээбит;
2019-2021 сылларга “Управление развития строительных технологий” (Москуба куоратын метротун оҥорор) хампаанньа дириэктэрин солбуйааччы;
2021 сыллаахха А.И. Герцен аатынан РГПУ ректорат иһинэн сүбэһит;
Кэргэннээх, икки оҕолоох.
Омскай куорат баһылыгын талар
Биһиги куораппытыттан үйэҕэ чугаһыыр балыс эрээри, нэһилиэнньэтэ мөлүйүөнү куоһарбыт, олус кэрэ тутуулардаах Омскай куорат баһылыгын быыбара чугаһаата. Саха сириттэн төрүттээх Елена Казанкова бу быыбарга бэйэтин кандидатуратын туруорда. Кини докумуонун ахсынньы ый 2 күнүгэр киллэрэн, докумуона толору эппиэттиир буолан, 27 нүөмэринэн бигэргэннэ.
Лидия идэтинэн дизайнер. Кини билиҥҥи кэмҥэ ОмГТУ-га дизайн хаапыдаратыгар ыстаарсай преподавателинэн үлэлиир. Интернет эйгэтигэр кини тус олоҕун туһунан сиһилии суруллубатах. Биллэрэ диэн, кини билигин сааһа 41 уонна бу эдэр сааһыгар “Российская партия пенсионеров за социальную справедливость” диэн биэнсийэлээхтэр баартыйаларын чилиэнэ.
Эспиэрдэр быһааралларынан, бу быыбарга барыларыттан “ОмскВодоканал” тэрилтэтин сүрүн дириэктэрэ Сергей Шелест чорбойуон, кыттааччылары барыларын куоһарыан сөп. Куорат аҕа баһылыгынан талыллыан баҕалаахтартан билигин даҕаны докумуоннар киирэ туралларын туһунан санаталлар. Бу быыбарданааччылар үгүс өттүлэрэ урбаанньыттар буолаллар эбит.
Баһылыгы дьокутааттар бэйэлэрэ талыахтара. Онуоха ахсынньы ый 15 күнүгэр дьокутааттар бу дьонтон икки киһини талыахтара, онтон хайалара чорбойбута куорат баһылыганан ананыаҕа. Баһылыгы талыы хамыыһыйатыгар 7 дьокутаат үлэлиэҕэ. Норуоту кытыннарбакка, бу маннык хабааннаах быыбар төрүөтүнэн, эрдэ куораты салайан олорбут Оксана Фадина соһуччу Госдумаҕа үлэлии барар буолбутунан ыйыллар.
-
0
-
0
-
0
-
0
-
0
-
0
