Ил Дархан Уһук Илин эрэгийиэннэрин куораттарын саҥардыыга туһуламмыт бырагымаама чэрчитинэн Дьокуускай куорат маастар-былаанын оҥорууга улахан болҕомтону туһаайда.
– Маастар-былааны оҥоруу өрөспүүбүлүкэбит киин куоратын тирээн турар кыһалҕаларын быһаарыыга, инники сайдыыгар төһүү буолуоҕа. Бу бырайыак Дьокуускай куорат уопсай сайдыытын эрэ буолбакка, кини социальнай-экономическэй сайдыытын, эйгэтин хаачыстыбатын үрдэтэр хайысхалары көрүөҕэ. Киин куораппыт дьон-сэргэ олороругар бары өттүнэн табыгастаах буолуохтаах уонна бу уларыйыыны куорат хас биирдии олохтооҕо бэйэтинэн билиэхтээх, – диэтэ Айсен Сергеевич.
Санатан эттэххэ, ааспыт ыйга Ил Дархан Дьокуускай куорат маастар-былаанын оҥорууга бүтүн Арассыыйатааҕы куонкуруһу биллэрбитэ. Куонкуруска куораты былааннааһыҥҥа үлэлэһэр хампаанньалар кыттыахтара, ким кыайбыт Дьокуускайы тупсаран оҥорууга үлэлиэҕэ. Тохсунньуга куорат туругун ырытар маастар-кылаас техническэй сорудаҕа бигэргэтиллиэҕэ. Кулун тутарга диэри ордук сиппит-хоппут уонна киин куоракка барсар бырайыактаах уон маастар-былаан талыллыаҕа.
Маны таһынан Айсен Николаев ыам ыйыгар «Сколково» Пуондатыгар, «Startup village» аан дойдутааҕы кэнпириэнсийэҕэ, Саха сирин инновационнай хампаанньаларын стартаптарын презентацията ыытылларын туһунан иһитиннэрдэ. Бу дьаһал Саха Өрөспүүбүлүкэтин 100 сылын бэлиэтээһин чэрчитинэн тэриллэрин Ил Дархан уонна Бырабыыталыстыба пресс-киинэ иһитиннэрэр.
-
0
-
0
-
0
-
0
-
0
-
0
