Издательский дом Редакция Подписка
Погода в Якутске: . -14 oC

Ааспыт ыйга Ил Түмэҥҥэ СӨ муниципальнай тэриллиилэрин бэрэстэбиитэллээх уорганнарын дьокутааттарын II сийиэһин чэрчитинэн, эдэр дьокутааттар стратегическай сиэссийэлэрэ буолан ааста.

Ааспыт ыйга Ил Түмэҥҥэ СӨ муниципальнай тэриллиилэрин бэрэстэбиитэллээх уорганнарын дьокутааттарын II сийиэһин чэрчитинэн, эдэр дьокутааттар стратегическай сиэссийэлэрэ буолан ааста.

Мунньаҕы Ил Түмэн Ыччат, физическэй култуура уонна успуорт дьыалаларыгар сис кэмитиэтин бэрэссэдээтэлэ Михаил Гуляев иилээн-саҕалаан ыытта.

Ил Түмэн судаарыстыбаннай тутулга уонна олохтоох салайыныы боппуруостарыгар сис кэмитиэтин бэрэссэдээтэлэ Владимир Прокопьев олохтоох салайыныы федеральнай сокуонугар киирэр уларыйыылары, билиҥҥи кэмҥэ эдэр дьокутааттар ылар ураты оруолларын, ыччакка дойдуга бэриниилээх буолуу суолтатын туһунан сырдатта. Ил Түмэн иһинэн үлэлиир Ыччат парламенын бэрэссэдээтэлэ Антон Васильев дойдуга ыччат парламентаризмын сүрүн тутулун, өрөспүүбүлүкэҕэ сайдыытын, инники кэскилин туһунан кэпсээтэ. Эдэр парламентарийдар, дьулуурдаах саҥа көлүөнэ ыччат өрөспүүбүлүкэҕэ былаас бары көрүҥнэрин кэскиллэрэ буолалларын бэлиэтээтэ.

Маны таһынан ыччат парламенын көҕүлээһининэн, ыччат хамсааһыныгар сыһыаннаах элбэх федеральнай уонна эрэгийиэннээҕи сокуоннар барылларыгар уларытыылар уонна көннөрүүлэр киирбиттэрин аҕынна. Анал байыаннай эпэрээссийэ кэмигэр кыайыы туһугар биир санааҕа сомоҕолоһон, дойдуга бэриниилээх буолуу үтүө холобурдарын көрдөрөргө дьулуһарга, өссө күүскэ түмсэргэ ыҥырда.

Ону таһынан, ыччаттар түмсүүлэрэ муниципальнай тэриллиилэринэн эдэр дьокутааттары кытта ыкса үлэлэһэллэригэр эттэ. Эдэр дьокутааттар Сэбиэттэрин стратегическай сиэссийэтин кэмигэр эдэр парламентарийдар хамаанданан арахсан өрөспүүбүлүкэ бары муниципалитеттарынан ыччат палаататын үлэтин-хамнаһын, инники тосхоллорун ырыттылар.

Артем Попов, Ыччат парламенын бэрэссэдээтэлин бастакы солбуйааччы: - Сийиэс чэрчитинэн ыытыллыбыт сиэссийэҕэ улуустартан 30-тан тахса эдэр дьокутаат кыттыынна. Кинилэр ыччат парламенын үлэтин-хамнаһын миэстэтигэр кэлэн билистилэр. Буолан ааспыт мунньахха ыччат парламена былааһы кытары сыһыана хайдах быһыылаахтык ыытыллыахтааҕын туһунан дьүүллэстибит.

Түмүгэр өрөсөлүүссүйэ ылыллан, этиилэрбит сийиэс түмүктүүр докумуонугар киириэхтэрэ. Бу тэрээһин эдэр дьокутааттар инникитин хайдах быһыылаахтык үлэлиллэригэр, былаан оҥостоллоругар тирэх буолуоҕа. Дойдуга бэриниилээх буолуу холобурун көрдөрүүгэ, тарҕатыыга, кэнчээри ыччакка тиэрдиигэ эдэр дьокутааттар инники күөҥҥэ сылдьыахтаахтар.

Трофим Иванов, Сунтаар нэһилиэгин дьокутаата, 26 саастаах: - 2020 сыллаахха нэһилиэк быыбарыгар кыттан, бэйэм уокурукпуттан талыллан нэһилиэк дьокутаата буолбутум. Сийиэс бастакы күннэриттэн кыттыыны ылабыт. Тэрээһиннэргэ түөрт эдэр дьокутаат буолан кэллибит. Сийиэс чэрчитинэн араас олус туһалаах төгүрүк остуоллар буолан аастылар. Улуустарынан үлэлиир ыччат парламенын түмсүүлэрэ инникитин даҕаны саҥалыы, дьиҥ олоххо-дьаһахха туһалаах бырагыраамаларга көхтөөхтүк кыттыахпыт. Бүгүҥҥү сиэссийэ бу хамсааһыннары өссө күүскэ сайыннарыаҕа диэн эрэнэбин.

Михаил Данилов, Ньурба улууһун Чаппанда нэһилиэгин дьокутаата, 28 саастаах: - 2022 с. дьокутаатынан талыллыбытым. Идэбинэн технология учууталынан, ону таһынан олохтоох дьаһалтаҕа ыччат исписэлииһинэн үлэлиибин. Буолан ааспыт мунньахтарга уонна кэпсэтиилэргэ ыччаттар култуура, үөрэх эйгэтигэр ылар оруолларын туһунан туһалаах дьүүллэһиилэри олус сэҥээрдим. Эдэр дьокутааттар төрөөбүт дойдуларыгар, нэһилиэктэригэр үөскүү турар кыһалҕалары үмүрүтэргэ дьулуһалларын хайгыы бэлиэтээтим. Бу курдук, тыа сиригэр эдэр исписэлиистэр үлэлииллэригэр-хамсыылларыгар сөптөөх усулуобуйа тэриллиэхтээх.

Дьүүллэһии түмүгүнэн Саха Сиригэр ыччат парламентаризмын сайыннарыыга Ил Түмэҥҥэ хамаандалар этиилэри киллэрдилэр. Кыттааччылар бэйэ-бэйэлэригэр чуолкайдыыр ыйытыктары биэрдилэр уонна инникитин бииргэ үлэлээһин былаанын ырыттылар. Суолталаах этиилэри Саха Өрөспүүбүлүкэтин муниципальнай тэриллиилэрин бэрэстэбиитэллээх уорганнарын дьокутааттарын II сийиэһин өрөсөлүүссүйэтигэр киллэриэхтэрэ.

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением