Мунньахха СӨ физическэй култуура уонна маассабай успуорт управлениетын салайааччыта Роман Оконешников, «Үлэҕэ уонна көмүскэниигэ бэлэм» Бүтүн арассыыйатааҕы физкультура-успуорт комплексын эрэгийиэннээҕи киинин начаалыныга Ариян Александров, СӨ Үлэҕэ министиэристибэтин Олох таһымыгар, хамнас уонна үлэ бэлиитикэтигэр, социальнай бииргэ үлэлээһиҥҥэ департаменын салайааччытын солбуйааччы Снежана Гуляева, СӨ профсоюзтарын федерациятын бэрэссэдээтэлин солбуйааччы Валентина Кириллина кытыннылар.
Мунньах өрөспүүбүлүкэҕэ ГТО нуорматын туттарыы бырыһыана намтааһынын кытта сибээстээх быһыыны-майгыны анаалыстааһынтан саҕаланна. Мунньах кыттыылаахтара сүрүн биричиинэлэринэн нэһилиэнньэҕэ бырагыраама туһунан сөптөөх иһитиннэрии суоҕа уонна физическэй култуура уонна успуорт сорох тэрилтэлэригэр материальнай-тиэхиньиичэскэй база ситэтэ суоҕа, итиэннэ ГТО нуорматын туттарыы былаанын толорууга эппиэттээх сирэйдэр суохтара буолуон сөбүн бэлиэтээтилэр. Бу биричиинэлэри туоратыы бары өттүнэн ырытыыны уонна кичэйэн дьүүллэһиини ирдиир.
Георгий Балакшин бэлиэтээбитинэн, ГТО нуорматын туттарбыт дьоҥҥо урут кэккэ чэпчэтиилэр бигэргэтиллибиттэрэ. Ол курдук, уоппускаҕа үс эбии төлөбүрдээх күнү биэрии, итиэннэ үлэлиир кыраасданнарга успуорт саалатыгар эбэтэр сиэксийэҕэ сылдьыы ороскуотун сороҕун толуйуу. Ол гынан баран, парламентарий көрүүтүнэн, бу дьаһаллар ситэтэ суохтар, тоҕо диэтэххэ чэпчэтиилэринэн олохтоохтор сааһынан араҥата барыта хабыллыбат.
Санаттахха, өрөспүүбүлүкэ парламена былырыын ГТО нуорматын туттарбыттарга компенсация уонна чэпчэтии көрүллэрин мэктиэлиир саҥа сокуону ылбыта. Билиҥҥи кэмҥэ судаарыстыбаннай уонна муниципальнай үп-харчы суотугар үбүлэнэр тэрилтэлэр кэллэктиибинэй дуогабардарыгар туһааннаах уларытыылары киллэрии үлэтэ ыытыллар.
Салгыы мунньах кыттыылаахтарыгар чэпчэтии быһыытынан 5-11 кылаастар үөрэнээччилэригэр уонна биэнсийэлээхтэргэ Дьокуускай к. уопсастыбаннай тырааныспарыгар босхо айаннааһыны көрөргө этии киллэрдилэр.
Ону таһынан быйыл муус устар ыйга өрөспүүбүлүкэ улуустарыгар ГТО-ну туттарыы бырагырааматын олоххо киллэриини сиһилии көрөргө туһаайыллыбыт төгүрүк остуолу бэлэмниир туһунан быһаарыы ылылынна. Бу төгүрүк остуолга ГТО нуорматын туттарыыга кыраасданнар интэриэстэрин үрдэтэр стратегияны оҥорору уонна бырагыраама ирдэбилин ситиһиилээхтик толорбут дьоҥҥо көмөлөһөр дьаһаллары дьүүллэһии былааннанар. Мунньах кыттыылаахтара ыччаты уонна интэриэстээх бары дьону успуордунан дьарыктаныыга көхтөөхтүк кытыннарыы өрөспүүбүлүкэҕэ уопсастыбаннай доруобуйа, итиэннэ физическэй култуура сайдыытыгар үтүө сабыдыаллаах буоларыгар эрэллээхтэрин эттилэр. СӨ профсоюзтарын федерацията Өрөспүүбүлүкэтээҕи (эрэгийиэннээҕи) 2023-2025 сылларга социальнай-үлэ сыһыаннаһыытын эйгэтигэр бииргэ үлэлээһин туһунан сөбүлэһиигэ эбиилэри киллэрэргэ этии киллэрдэ.
Мунньах түмүгэр тустаах сис кэмитиэт бэрэссэдээтэлэ Георгий Балакшин нэһилиэнньэ физическэй көҕүн үрдэтиигэ уонна ГТО бырагыраамата дьоҥҥо биһирэнэригэр, итиэннэ доруобай нацияны сайыннарыыга, спортивнай тыыны бөҕөргөтүүгэ бары интэриэстээх өрүттэр бииргэ үлэлээһиннэрэ улахан суолталааҕын тоһоҕолоон бэлиэтээтэ.
Хаартыскалар: https://iltumen.ru/
-
1
-
0
-
0
-
0
-
0
-
0
