Ил Түмэн хоту дойду төрүт олохтоох аҕыйах ахсааннах норуоттар боппуруостарыгар уонна Аартыка дьыалаларыгар сис кэмитиэт бэрэссэдээтэлэ Елена Голомарева бу күннэргэ кыраасданнары кытта тус көрсүһүүлэри ыытар кэмигэр киниэхэ тыыл, үлэ бэтэрээнэ, Кэбээйи улууһун ытык сүбэтин бэрэссэдээтэлэ, Кэбээйи улууһун бочуоттаах кырасданьыына, РСФСР норуодунай үөрэҕириитин туйгуна, Кэбээйи улууһун устуоруйатын туһунан кинигэлэр ааптардара Никифор Дмитриевич Терехов тус киирэн Сангаар бөһүөлэгэр “Үлэ Албан аат куората” ааты иҥэрэр туһунан туруорсарсын иһитиннэрдэ.
Билигин 93 хаарыгар сылдьар ытык бэтэрээн быйыл Улуу Кыайыы 80 сылынан уонна Сангаар төрүттэммитэ 100 сылын туолар үбүлүөйүнэн бу маннык этиини Кэбээйи улууһун сэрии уонна үлэ бэтэрээннэрин Сэбиэтэ уонна Сангаар бөһүөлэгин кырдьаҕас олохтоохторо туруорсаллар диэн тоһоҕолоон бэлиэтээтэ. Салгыы Сангаар бөһүөлэгин туһунан “Сангар. Хроника, факты, события. 1928-1959 гг. и 1958-1978 гг.” диэн икки томнаах кинигэлэригэр киирбит Сангаар чох бырамыссыланнаһын бастакы киинин быһыытынан сайдыытын билиһиннэрдэ.
Елена Голомарева Алдан куоракка “Үлэ Албан аат куората” аат хайдах иҥэриллибитин туһунан кэпсээн туран, бэтэрээн туруорсуутун толору өйүүрүн биллэрдэ уонна бу туруорсуутунан сайаапканы олохтоох салайыныы уорганнарыгар киллэрэригэр сүбэлээтэ. Салгыы сайаапка эрэгийиэн сокуону оҥорор уонна судаарыстыбаннай ситэриилээх былааһын уорганнарыгар көрүүгэ киириэхтээх диэн чопчулаата. Норуот дьокутаата сэрии бэтэрээннэрин уонна үлэһит дьон туруорсууларын тус хонтуруолугар ылла.
Хаартыска: Ил Түмэн
-
3
-
0
-
0
-
0
-
0
-
0
