Сиэссийэ бэбиэскэтигэр ыйыллыбытынан, норуот дьокутааттара 32 боппуруоһу көрүөхтэрэ, ол иһигэр КПРФ баартыйаттан Вячеслав Степанов боломуочуйатын бигэргэтии туһунан боппуруоһу көрүөхтэрэ.
Пленарнай мунньахха ИДьМ миниистирэ Владимир Прокопенко ИДьМ уорганнарын 2025 сыллааҕы үлэтин туһунан иһитинэрии оҥоруоҕа. Бу отчуот ааспыт нэдиэлэҕэ парламент судаарыстыбаннай тутулга уонна сокуон оҥоруутугар сис кэмитиэт кэҥэтиллибит мунньаҕар көрүллүбүтн бэлиэтиэххэ сөп. Билиһиннэрии түмүгүнэн дьокутааттар сүрүн хайысхаларынан үлэни күүһүрдэргэ бэлиэтээбиттэрэ. Ол курдук, сокуоннай саастарын туола илик оҕолор ортолоругар сокуону кэһии элбээбитинэн, суол-иис быраабылатын кэһиигэ уонна миграцияны хонтуруоллааһыҥҥа баар кыһалҕалары быһаарарга эбии миэрэлэри ыларга ыҥырбыттара.
Тыа хаһаайыстыбатын оҥорон таһаарааччыларыгар улахан суолталаах боппуруоһу — 2026 сылга судаарыстыбаннай бырагырааманы үбүлээһини сиэссийэ чэрчитинэн бырабыыталыстыба чааһыгар дьүүллэһиэхтэрэ. «Саха Өрөспүүбүлүкэтин «Тыа хаһаайыстыбатын сайыннарыы уонна тыа хаһаайыстыбатын бородууксуйатын уонна аһы-үөлү оҥоруу ырыынагын сүрүннээһин» судаарыстыбаннай бырагырааматын 2026 сылга үбүлээһиҥҥэ бастакы уочараттааҕы дьаһаллар туһунан» сүрүн дакылааты тыа хаһаайыстыбатын уонна ас-үөл бэлиитикэтин миниистирэ Артем Александров оҥоруоҕа.
Ону тэҥэ мунньахха хас да суолталаах боппуруостар көрүллүөхтэрэ, ол иһигэр: тулаайах уонна төрөппүт көрүүтэ-истиитэ суох хаалбыт оҕолору олорор дьиэнэн хааччыйыы, сир баайын туһунан, Хаҥалас улууһун Хачыкаат сэлиэнньэтин сиригэр-уотугар арыгыны атыылааһыны толору бобуу туһунан, о.д.а.
Олох-дьаһах, олорор дьиэ бэлиитикэтэ норуот дьокутааттарын болҕомтолорун ортотугар сылдьар - элбэх кыбартыыралаах дьиэлэргэ уопсай баайы-дуолу хапытаалынай өрөмүөннээһини тэрийии; «Дьокуускай куорат» куораттааҕы уокурук олохтоох салайыныы уорганнарыгар элбэх кыбартыыралаах дьиэлэри салайыыга олорор дьиэлэри эрэгийиэннээҕи судаарыстыбаннай хонтуруоллааһын (кэтэбил) уонна лиссиэнсийэлээһини хонтуруоллааһын өттүгэр сорох судаарыстыбаннай боломуочуйалары биэрии көрүллүөхтэрэ.
Дьокутааттар ону тэҥэ, оробуочай каадырдарынан хааччыллыы кыһалҕата сытыытык турарынан “ Саха Өрөспүүбүлүкэтигэр Үөрэхтээһин туһунан” сокуонугар уларытыылары киллэриэхтэрэ. Онуохаҕа сүрүн сыал-сорук - оробуочай идэлэри киэҥник билиһиннэрии, популяризациялааһын эрэ буолбакка, төһө кыалларынан бу идэлэргэ босхо үөрэтиини кэҥэтии, киллэрии. Өрөспүүбүлүкэ судаарыстыбаннай былааһын уорганнара үөрэтиини ыытарга анаан ханнык-туох идэлэр, тэрилтэлэр биэрэчэннэрин чуолкайдыахтара.
Ону таһынан, ХVII-с уочараттаах сиэссийэ былааныгар атын да боппуруостар көрүллэллэрэ киирэн турар.
Хаартыска Ил Түмэн пресс-сулууспата
-
1
-
0
-
0
-
0
-
0
-
0
