«Бу түгэни биһиги күүппүппүт ыраатта. Ол курдук, Саха Өрөспүүбүлүкэтин V ыҥырыылаах Ил Түмэнин Бэрэссэдээтэлэ Александр Николаевич Жиркову кытта маннык сөбүлэһии түһэрсэр туһунан биһиги өссө эрдэ болдьоспуппут», – диэн саҕалаата бэйэтин этиитин Хакасия Өрөспүүбүлүкэтин Үрдүкү Сүбэтин Бэрэссэдээтэлэ Владимир Штыгашев.
Хакасия Өрөспүүбүлүкэтигэр 2021 сыл Хакас эпоһын сылынан биллэриллибитэ. Саха сиригэр Александр Жирков көҕүлээһининэн 2006 сыллаахха «Саха Өрөспүүбүлүкэтин олохтоох норуоттарын эпическэй нэһилиэстибэлэрин харыстааһын уонна үйэтитии» диэн сокуон ылыныллан турар. Бу кэнниттэн Хакасия Өрөспүүбүлүкэтигэр маннык ис хоһоонноох сокуон 2018 сыллаахха ылыныллыбыта. Александр Жирков көҕүлээһининэн Саха Өрөспүүбүлүкэтин Ил Түмэнэ 2019 сыллаахха Государственнай Думаҕа «Россия Федерациятын норуоттарын эпическэй нэһилиэстибэлэрин туһунан» диэн сокуон барылын оҥорон киллэрбитэ.
Маны таһынан, эпическэй айымньылары үйэтитэр, эйгэлэрин кэҥэтэр туһугар «Аан дойду эпическэй айымньылара» диэн серия олохтонон, бастаан кыргыыстар «Манаас», онтон салгыы алтаайдар «Маадай Хара», башкирдар «Ураал Баатыр» эпическэй айымньылара сахалыы тылбаастанан тахсыбыттара, тывалар «Хунан Харалара» тылбаастанан бүтэн эрэр. Хардарыта биһиги «Дьулуруйар Ньургун Боотур» олоҥхобут бүгүҥҥү күҥҥэ кыргыыс, алтаай тылларыгар тылбаастанан таҕыста, башкир, тыва тылынан тылбаастана сылдьар. Бу ыытыллар үлэ бырааттыы норуоттар эпическэй баайдарын үөрэтиигэ уонна тарҕатыыга улахан көмөлөөх, өбүгэлэрбит харыстаан илдьэ кэлбит тылынан уус-уран айымньыларын чыпчаалын – эпоһы үйэтитии биир дьоһун көрүҥэ буолар.
Александр Жирков көрдөһүүтүнэн эпоһы үйэтитии үлэтин Алтаайга, Тываҕа, Хакасияҕа бу өрөспүүбүлүкэлэр Үрдүкү Мунньахтарын бэрэссэдээтэллэрэ Иван Белеков (билигин РФ Госдуматын депутата), Даваа Кан-Оол Тимурович уонна Владимир Штыгашев тус бэйэлэринэн иилииллэр-саҕалыыллар.
Ил Түмэн пресс-сулууспата
-
0
-
0
-
0
-
0
-
0
-
0
