Бэлиитикэ

Үс күннээх мунньаҕы Ил Түмэн бүддьүөккэ, үпкэ-харчыга, нолуокка уонна сыана бэлиитикэтигэр, бас билии уонна приватизация боппуруостарыгар сис кэмитиэтэ ыыта сылдьар.  Ол курдук, 2022 сыл бүддьүөтүгэр эбии маннык көннөрүүлэри киллэрдилэр:

--Көтөр ааллары түһэрэр былаһааккалары көрүүгэ-истиигэ уонна сигналлыыр тэриллэри атыылаһарга тыырыллыбыт үп кээмэйин улаатыннардылар: 7 мөл. солкуобайтан 25 мөл. солк. диэри.

--Толорор (ситэриилээх) былааһы гидрометеорологическай информациянан хааччыйарга 18 мөл. 813, 5 тыһ. солк. көрдүлэр.

“Ити гидрометеорологической информация диэн эмиэ туохпутуй?”—диэн этиэхтэрэ. Өрөспүүбүлүкэни салайар дьоҥҥо олус наадалаах. Халаан уута кэлиитин, сайын кураанныырын, өрүс хаһан эстэрин, о.д.а. айылҕа уларыйыыларын эрдэттэн билэ олороллоругар абыраллаах. Оччоҕо эрэ сэрэтэр уонна бэлэмнэнэр үлэни кэмигэр ыытар буоллахтара дии. Күн-дьыл туругунан салайтардахха эрэ, тыа хаһаайыстыбатын үлэтин сөпкө тэрийэҕин, баһаардары куоттарбакка бохсоҕун”, -- диэн быһааран биэрдилэр дьокутааттар Владимир Прокопьев, Евгений Перфильев.

Парламентарийдар Виктор Губарев, Виктор Федоров, Анатолий Николаев, Елена Голомарева санитарнай рейстэргэ үп элбэх көрүллүөн наадатын тоһоҕолоотулар.

Билигин өрөспүүбүлүкэбитигэр 170 авиа-былаһаакка баар эбит. Итинтэн 130-тугар эрэ дьону таһар ааллары көтүтэр кыахтаахтар. Аны, балаһалар үксэ чыпчылыҥныыр тэриллэринэн хааччыллыбатахтар, ол иһин үөһэттэн көрдөххө, онон-манан аҕыйах уот эрэ күлүмнүүр. Ол иһин түүн суһал көмө наада буоллаҕына, халлаан суһуктуйуутун күүтэллэр. Оттон санаан көрүҥ, күнэ суох кыһыннаах хотугу эргимтэни? Манна олорор дьон хайдах буолаллар? Хас эмэ ыйынан күн тахсарын күүтэллэр дуо?

Дьэ, ол иһин норуот дьокутааттара СӨ Тырааныспарга уонна суол хаһаайыстыбатыгар министиэристибэтигэр бу хайысхаҕа субсидия боппуруоһун үөрэтэ охсоругар эттилэр. Оттон бу мунньахха бырабыыталыстаба сүбэлээбит 7 мөл. солкуобайыгар дьокутааттар эбии 18 мөл. солк. эптилэр. Онон авиа-былаһааккалары оҥорууга уопсайа 25 мөл. солк. ананна.

В.М. Прокопьев, С.М. Афанасьев, М.Н. Евсеев өрөспүүбүлүкэ иһигэр ыытыллар геологоразведочнай үлэлэргэ үбү улаатыннарарга этиилэригэр СӨ Бырабыыталыстыбата 54 мөл. 674 тыһ. солк. көрөргө сөбүлэстэ.

П.П. Петрова  «Полярные авиалинии» сөмөлүөттэрин саҥардарга этиитин 600 мөл. солк. харчынан өйөөтүлэр. “Тоҕо кыратай?” – диир буоллахха, СӨ Бырабыыталыстыбатын Бэрэссэдээтэлэ Андрей Тарасенко: «Якутия» АК лизининэн атыыласпыт сорох көтөр аалларын «Полярные авиалинии» хампаанньаҕа биэрэр соруктаахпыт”, -- диэн чопчулаата.

Уопсайынан, бүддьүөт кэлэр сыллааҕы бырайыагын бастакы ааҕыы кэнниттэн СӨ Бырабыыталыстыбата 9 млрд. 175,6 мөл. солк. суумаҕа 238  көннөрүүнү киллэрбитэ. Оттон бу оробуочай хамыыһыйа сөбүлэҥ мунньаҕар норуот дьокутааттара 28 көннөрүүлэрин (итинтэн 18-һа бырабыыталыстыба киэнин кытта сөп түбэһэр) ылыннылар.

Ол курдук, Орто Халыма балыыһатыгар КТ аппараата туруохтаах сирин өрөмүөннүүргэ 6 мөл. солк., “Заря” мини-футбол кулуубугар 22 мөл. 616 тыһ. солк., “Якутия” медиахолдинг матырыйаалынай-тиэхиньиичэскэй базатын бөҕөргөтөрүгэр 25 мөл. солк., Амма Аччыгыйа аатынан “Кэскил” оҕо бэчээтин кыһатыгар 1,5 мөл. солк. көрүллэр буолла.       

Онон дьокутааттар Ил Түмэн бүддьүөккэ туһааннаах сис кэмитиэтэ 2022 сыллааҕы үбүлээһин бырайыагын хаттаан көрөрүгэр, сууматын улаатыннарарыгар эттилэр.