Александр Жирков Сербия парламенын норуоттар икки ардыларынааҕы сыһыаннаһыыларга кэмитиэтин салайааччыта, Сербия Өрөспүүбүлүкэтин парламенын бэрэссэдээтэлин сүбэһитэ Миломир Премовичтыын, ону тэҥэ Сербия уонна Арассыыйа доҕордуу сыһыаннаһыыларыгар уонна хардарыта алтыһыыларыгар дьокутааттар бөлөхтөрүн кыттыылаахтарын кытта көрүстэ.
Кэпсэтиигэ парламентарийдар икки судаарыстыба үйэлэр тухары бэйэ бэйэлэрин өйөһөн, итэҕэйсэн кэлбит истиҥ сыһыаннарын болҕомтоҕо ыллылар. Ордук бырабыыталыстыбалар, эрэгийиэннэр уонна муниципальнай тэриллиилэр хардарыта алтыһыылара кэҥиир кыахтааҕын бэлиэтээтилэр. Чуолаан үөрэхтээһин, наука, культура, успуорт, туризм, үрдүк технология хайысхаларыгар уонна үрдүк үөрэх кыһалара бииргэ үлэлэһэллэригэр икки өттүттэн интэриэс баарын биллэрдилэр.
Ил Түмэн бэрэссэдээтэлин бастакы солбуйааччы Александр Жирков Саха сирэ уонна Сербия ыкса алтыһыытын, итиэннэ биир сыалга-сорукка киирэн үтүө түмүктэри ситиһэр инниттэн, былаас бары таһымыгар сөбүлэҥ түһэрсэр ордук тоҕоостооҕун бэлиэтээтэ. Онуоха икки өттүттэн хас биирдии хайысхаҕа сүбэлэһэр, санаа атастаһар наадатын ыйда.
Маны таһынан Сербияҕа сылдьан, вице-спикер саха замлячествотын кытта көрүстэ. Кэпсэтии түмүгэр Александр Жирков тас дойдуларга олохтоох биир дойдулаахтарбытын кэлэр сайын Дьокуускайга, өрөспүүбүлүкэ 100 сылын көрсө, ыытыллар форумҥа кытталларыгар ыҥырда.
Санатан бэлиэтиир буоллахха, бу дьыл ахсынньы саҥатыгар Белоруссия Өрөспүүбүлүкэтин Гомель уобалаһын дьокутааттарын сэбиэтэ уонна Саха Өрөспүүбүлүкэтин Ил Түмэнэ сөбүлэҥ түһэрсибиттэрэ. Докумуону Ил Түмэн өттүттэн спикер Алексей Еремеев, онтон Гомель уобалаһын дьокутааттарын сэбиэтиттэн бэрэссэдээтэл Екатерина Зенкевич баттаспыттара. Тэрээһин 2022 сылга былааннаммыт Белоруссия уонна Арассыыйа Бэдэрээссийэтин эрэгийиэннэрин IX форумун көрсө ыытыллыбыта өссө ордук суолталанна. Үгэс быһыытынан форум Федерация Сэбиэтин уонна Белоруссия Норуодунай Мунньаҕын Өрөспүүбүлүкэ Сэбиэтин эгидэлэринэн ыытыллар.
Өссө биир икки өттүттэн барыыстаах дьылабыай сыһыаны олохтуур сөбүлэҥ 2019 сыл сайыныгар Корея Өрөспүүбүлүкэтин Кёнсанбук-до провинциятын парламенын кытта түһэрсиллэр турар. Докумуону Саха Өрөспүүбүлүкэтин Ил Түмэнин бэһис ыҥырыытын бэрэссэдээтэлэ Александр Жирков уонна Кёнсанбук-до провинция парламенын бэрэссэдээтэлэ господин Чан Гён Сик баттаспыттара.
Түмүктээн эттэххэ, Ил Түмэн уонна Сербия Өрөспүүбүлүкэтин парламена кэпсэтиилэрин ситиһиилээхтик түмүктээтэхтэринэ, Саха парламенын норуоттар икки ардыларынааҕы ситимин кэҥэтэр үһүс сөбүлэҥ буолуо.
Ил Түмэн пресс-сулууспатын матырыйаалынан
-
0
-
0
-
0
-
0
-
0
-
0
