Ол иннинэ өрөспүүбүлүкэбитигэр олохтоох бэйэни салайыныы сокуонун барылын уопсастыбанньыктар, баһылыктар, дьокутааттар элбэхтэ дьүүллэстилэр, тугу туруорсалларын эттилэр, санааларын үллэһиннилэр.
Тохсунньу 17 күнүгэр Ил Түмэн XXXIII (уочарата суох) пленарнай мунньаҕар сокуон барылын көрдүлэр уонна норуот дьокутааттара өйөөтүлэр.
Сокуон сүрүн тосхоло -- олохтоох бэйэни салайыныыны биир таһымнаах оҥорон, норуоту былааска чугаһатар, үлэни сүрүннүүрү судургутар соруктаах.
Ил Түмэн судаарыстыбаннай тутулга уонна олохтоох салайыныыга сис кэмитиэтин бэрэссэдээтэлэ Владимир Прокопьев:
--Биһиги бэйэбит көрөрбүтүнэн, бу сокуонунан нэһилиэк таһымыгар дьокутаат диэн суох буолбутун да иһин, нэһилиэктэн улуус мунньаҕар хас да бэрэстэбиитэл талыллан, бөһүөлэктэрин интэриэһини көмүскүөхтэрин, туруорсуохтарын сөп. Улуус баһылыга, судаарыстыбаннай дуоһунастаах үлэһит быһыытынан, кини өрөспүүбүлүкэ бүддьүөтүн тыырсыыга кыттар бырааптаах, барытыгар оруоллаах буолар. Ону бу сокуон барыла чуолкайдыыр. Чопчутук суруллубут уонна өйдөнүмтүө, олоххо көдьүүстээх сокуон буолуо диэн эрэллээхпин.
Бу сокуон 90-с сыллартан олоххо киирэ сатыыр да, араас уларыыйалар киирэ туралларынан, икки таһымнаах бэйэни салайыныы биһиги өрөспүүбүлүкэбитигэр 2009 сыллаахха биирдэ олохтоммута.
Туох уларыйыыны бу сокуон түстүө диэтэргит, бастатан туран, олохтоох бэйэни салайыныы биир таһымнаахха көһүө. Иккиһинэн, “көһөр кэм” (переходный период) болдьоҕо бигэргэниэ.Үсүһүнэн, муниципальнай тэриллии салалтатын боломуочуйаларын чопчулуо. Нуорма баар, онно олоҕуран, билигин баар муниципальнай сулууспалаахтары бэйэлэринэн хаалларыахха сөп. Өрөспүүбүлүкэ салалтата оннук гына сатыа. Коллегиальнай уорган тэриллиэ, ол үлэ көдьүүстээх буоларыгар төһүү буолуо.
-
0
-
0
-
0
-
0
-
0
-
0
