Бырабыыталыстыба чааһын Ил Түмэн экэниэмикэҕэ, инвестицияҕа уонна бырамыысыланнай бэлиитикэҕэ сис кэмитиэтин бэрэссэдээтэлэ Павел Петров салайан ыытта. Сүрүн дакылааты СӨ Бырабыыталыстыбатын бэрэссэдээтэлин бастакы солбуйааччы Кирилл Бычков оҥордо, кини дакылаатын миниистирдэр эбии ситэрэн биэрдилэр.
Ол курдук, РФ Бэрэсидьиэнин анал этиитигэр эрэгийиэннэр инфраструктураларын сайыннарыыга сыһыаннаан бэлиэтээбит соруктарын олоххо киллэрэргэ федеральнай инфраструктурнай кирэдьиит сүрүн көмөнөн буоларын ыйдылар. Кирилл Бычков кирэдьиит чэпчэтиилээх ыстаапкалааҕын уонна 15 сылга ылылларын туһунан эттэ. «Биллэн турар, бу төннөрүллэр кирэдьиит. Ыстаапката кыра буолан, өрөспүүбүлүкэ бүддьүөтүгэр киирэр нолуок дохуотунан сорох чааһын сабыахпытын сөп. Эрэгийиэн бүддьүөтүгэр наһаа улахан ноҕурууска буолуо суоҕар эрэнэбит», -- диэн быһаарда.
Дакылаатчыттар Владимир Путин Анал этиитин соруктарын чэрчитинэн Саха сиригэр киириэхтээх бырайыактары билиһиннэрдилэр. Бөдөҥ бырайыагынан Өлүөнэ өрүс муостата буолар. Маны таһынан Дьокуускай куоракка «Воинскай часть» диэн уонна Нерюнгри куоратыгар «Р» диэн элбэх кыбартыыралаах дьиэлэрдээх, социальнай эбийиэктэрдээх саҥа кыбаарталлар тутуулара, Жатайга саҥа судоверфь, Дьокуускай куоракка дааннайдары харайар электроннай киин дьиэтин тутуу, Нерюнгрига уу уонна канализация ситимин өрөмүөннээһин, Саха сирин Аартыкатын түөлбэтин улуустарыгар ас-үөл тиэйэр киини тэрийии, Мэдиссиинэ национальнайкиинин хапытаалынайдык өрөмүөннээһин уонна үгүс кыра бырайыактар былааннаммыттар. Бу үлэни олоххо киллэрэргэ РФ Бырабыыталыстыбатыгар 28 млрд солкуобайга сайаапка түһэрбиттэр. Эрэгийиэннэртэн сайаапканы от ыйын 1 күнүгэр диэри көрөллөр. «От ыйыгар бырайыактарбытынан түһэрбит сайаапкаларбыт дьылҕата биллиэ, төһө үбү көрөллөрө чуолкайданыаҕа. Биһиги барыйыактар докумуоннарынан улахан үлэни ыыппыппыт, онон ирдэнэр үп үгүс өттө бигэргэниэ диэн эрэнэбит», -- диэн Кирилл Бычков эттэ.
Бырабыыталыстыба чааһын туһунан сиһилии «Ил Түмэн» бэс ыйын 18 күнүгэр ааҕыҥ.
-
0
-
0
-
0
-
0
-
0
-
0
