Ону таһынан саҥа уларыйыыларга оскуоланы бүтэрээччилэргэ үрүҥ көмүс мэтээли туттарыы киирдэ. Үөрэнээччи бэйэтин сааһыгар сөптөөх, уопсастыбаҕа туһалаах үлэҕэ төрөппүтүттэн сөбүлэҥэ суох булгуччу кыттар буолуоҕа.
Бу иннинэ, сокуону дьүүллэһии кэмигэр бэл кылаас сууйарга төрөппүт сөбүлэҥэ наада диэн этиилэр иһиллэр этилэр. Билигин ол уларыйда. Оскуола тиэргэнин көҕөрдүүгэ, маһы уонна сибэккини олордуута, оскуола былаһааккатын, кылааһы ханнык эмит тэрээһиҥҥэ бэлэмнээһин, оскуола тыйаатырыгар анаан көстүүмнэри оҥоруу, түмэлгэ эбэтэр бибилэтиэкэҕэ көмөлөһүү курдук уопсастыбаннай үлэлэр оҕолор санныларыгар сүктэриллиэхтэрэ.
2023-2024 үөрэх дьылыттан саҕалаан, «Үөрэххэ ураты ситиһиилэрин иһин» II истиэпэннээх үрүҥ көмүс мэтээллэр туттарыллар буолуохтара. Маннык наҕарааданы аттестаттарыгар икки «үчүгэйтэн» ураты атына барыта «туйгун» сыаналаах үөрэнээччилэр ылыахтара.
Федеральнай сокуонунан үүнэр үөрэх дьылыгар «Оскуола оҕолоругар профориентация үөрэҕэ» диэн идэни таларга көмөлөөх дьарыктар ыытыллар буолуохтара.
Оттон эһиилгиттэн «Куттал суох буолуутун төрүттэрэ уонна Ийэ дойдуну көмүскээһин» диэн биридимиэт үөрэх бырагырааматыгар киириэҕэ. Итинник урукку ОБЖ биридимиэтэ аата уонна ис хоһооно уларытыллыаҕа.
Хаартыска аhаҕас источниктан ылылынна.
-
0
-
0
-
0
-
0
-
0
-
0
