Өрөспүүбүлүкэ баһылыгын дуоһунаһыгар үктэнэн баран оҥорор үһүс уочараттаах анал этиитэ парламент, бырабыыталыстыба, олохтоох салайыныы уорганнарын үлэлэрин сүрүн хайысхалара этилиннилэр, дьоҥҥо-сэргэҕэ кэскилгэ эрэли саҕар ис хоһоонноох буолла. Тэрээһиҥҥэ норуот дьокутааттара, бырабыыталыстыба чилиэннэрэ, Ил Дархан уонна бырабыыталыстыба дьаһалтатын салайааччылара, суут уонна борокуратуура уорганнарын, федеральнай ситэриилээх былаас Саха сиринээҕи уорганнарын бэрэстэбиитэллэрэ, куорат уокуруктарын баһылыктара, Саха сиригэр боломуочунайдарын института, тэрилтэлэр салайааччылара, уопсастыбаннай диэйэтэллэр кыттыыны ыллылар. Туһаайыыны өрөспүүбүлүкэ саалатыттан быһа эпииргэ НВК «Саха» уонна «Якутия 24» ханаалларга көрдөрдүлэр, «Тэтим» араадьыйаҕа иһитиннэрдилэр.
Киирии тылыгар 2022 сылга Саха АССР 100 сылыгар сөп түбэспитэ мээнэҕэ буолбатаҕын бэлиэтээтэ. Саха дьоно туспа аптаныамыйалаах өрөспүүбүлүкэ буола сайдыыбыт бүтүн үйэ буолбута, норуот быһыытынан инникилээхпитин көрдөрөр.
Доруобуйа харыстабыла
Доруобуйа харыстабылыгар, коронавируһу утары охсуһууга үгүс этии оҥоһулунна. «Быйыл биһиги коронавируһу утары охсуһууга олохтоох сиргэ оҥоһуллубут вакцинанан хааччылынныбыт. Быһыыны ылан бэйэбитин уонна чугас дьоммутун сыстыганнаах коронавирус ыарыытыттан харыстанар кыахтанныбыт. Билиҥҥи туругунан өрөспүүбүлүкэҕэ улахан дьон 40% вакцинаны ыллылар», — диэн Айсен Сергеевич иһитиннэрдэ. Маны таһынан Ил Дархан өрөспүүбүлүкэҕэ доруобуйа харыстабылын сайыннарыы судаарыстыбаннай бырагырааматыгар «Здоровая жизнь после ковида» диэн анал бырайыагы олохтуур туһунан этии киллэрэрин туһунан иһитиннэрдэ.
-
0
-
0
-
0
-
0
-
0
-
0
