Маны таһынан, эрэгийиэн баһылыга дьиэ кэргэни өйүүр атын саҥа дьаһаллар тустарынан эмиэ эттэ уонна ийэ, оҕо саас саамай сытыы кыһалҕаларын быһаарары түргэтэтэргэ наадалааҕын бэлиэтээтэ. Чуолаан инники биэс сылга СӨ Бырабыыталыстыбатыгар биэс уонна онтон элбэх оҕолоох ыалларга олорор дьиэлэрин тупсарынарга төлөбүрдэрин хааччыйарга сорудахтаата.
«Биэс уонна онтон элбэх оҕолоох ыаллар дьиэ-уот усулуобуйатын тупсарыы төлөбүрүн ылар уочаратыгар 1815 дьиэ кэргэн турар, итинтэн быйыл төлөбүрү 56 ыал ылбыта. Бу төлөбүрдэр 2012 сылтан олохтонуоҕуттан 600 эрэ ыал тигистэ. Маннык тэтиминэн ыал уочаратын 30-тан тахса сыл күүтэригэр тиийэр. Бырабыыталыстыба иннигэр эбии мэхэньиисимнэри оҥорорго уонна парламены кытта чугастааҕы биэс сылга бу боппуруоһу быһаарарга сорук туруорабын», - диэтэ баһылык.
Итини таһынан, олохтоох салайыныы уорганнарыгар туһаайан, биэс уонна онтон элбэх оҕолоох ыаллары нолуоктан толору босхолуурга этии киллэрдэ. Оҕону иитэ ылбыт ыалларга ыйдааҕы төлөбүр кээмэйин икки төгүл улаатыннарарга, ону тэҥэ үс сыл устата Дьокуускайга дьиэ кэргэҥҥэ уонна оҕолорго социальнай көмө киинин тутарга сорудахтаата. Ийэ буолууну өйүүр бырайыактары олоххо киллэриигэ уопсастыбаннай тэрилтэлэргэ гранынан үбүлээһини икки төгүл улаатыннарарга этиннэ. Дьахтар уонна ийэ буолуу саҥа быраактыкаларын кыахтарын кэҥэтиигэ ураты болҕомтотун уурда.
Кини этэринэн, 2022 сылга дьахталлар олорор сирдэриттэн, саастарыттан уонна социальнай балаһыанньаларыттан тутулуга суох Дьарыктаах буолуу сулууспалар болҕомтолорун киинигэр ылыллыахтара. Дьахтар доруобуйатын тупсарыыга саҥа анал бырагыраамалар баар буолуохтара. «Бу дьаһаллар элбэх оҕолоох ыаллар олохторун тупсарыналларыгар, ийэлэргэ болҕомто ууруллубутун бэлиэтээн, дьоллоох буолуохтара диэн эрэнэбин», - диэн түмүктээтэ.
-
0
-
0
-
0
-
0
-
0
-
0
