Тэрээһиҥҥэ Ил Түмэн дьокутааттара Антонина Григорьева, Алена Атласова, Георгий Балакшин, Елена Голомарева, Александр Корякин, Владимир Прокопьев, Иван Данилов уонна министиэристибэлэр, биэдэмистибэлэр, 39 судаарыстыбаннай итиэннэ муниципальнай, национальнай бибилэтиэкэ бэрэстэбиитэллэрэ кытыннылар.
Виктор Губарев киирии тылыгар уопсастыба олоҕор бибилэтиэкэ дириҥ суолтатын туһунан эттэ. Кини 90-нус сыллар саҕаланыыларыгар бибилэтиэкэ үлэһиттэрэ хорсуннарын көрдөрбүттэрэ, ити ыарахан, ыһыллыы-тоҕуллуу кэмигэр биир даҕаны бибилэтиэкэ сабыллыбатаҕын санатта. «Бу биһиги култуура өттүнэн көмүскэллээх буолуубут көстүүтэ, хаачыстыбалаах литэрэтиирэни ааҕар киһи – аныгы олох киһитэ», - диир кини. Аартыка сиригэр 96 бибилэтиэкэ баарыттан биэһэ эрэ модельнай эбит. Онон атыттар федеральнай граннар куонкурустарыгар кыттар кыахтара суоҕун бэлиэтээтэ, олорго көмөлөһөр наадата сытыытык турарын бэлиэтээтэ.
Төгүрүк остуолга сүрүн дакылааты Култуура уонна духуобунай сайдыы миниистирин солбуйааччы Марина Силина оҥордо. Кини 2022 с. түмүгүнэн Саха Сирэ Арассыыйаҕа бибилэтиэкэҕэ сылдьыы көрдөрүүтүнэн инники тахсыбытын эттэ. Үс кэлиҥҥи сылга бибилэтиэкэҕэ сылдьыы 40,3 бырыһыан улааппыт. 2024 с. тохсунньутугар өрөспүүбүлүкэҕэ 504 бибилэтиэкэ баар. Дакылаатчыт бибилэтиэкэлэр фондаларын саҥа кинигэлэринэн хааччыйыыны тупсарар наадатын, 12 бибилэтиэкэ дьиэтигэр капитальнай өрөмүөн ирдэнэрин, оттон 11 бибилэтиэкэ дьиэтэ олох хаарбах туруктаахтарын, Муома уонна Таатта улуустарыгар дьиэлэрэ суоҕунан быстах атын дьиэлэргэ баалларын иһитиннэрдэ. Мария Силина дьокутааттарга туһаайан эрэгийиэн бүддьүөтүттэн модельнай бибилэтиэкэлэри тэрийиигэ сыллата көрүллэр 5 мөл.солк. оннугар 20 мөл. харчыны көрөллөрүгэр туруоруста.
Национальнай бибилэтиэкэ дириэктэрэ Саргылана Максимова 2025 с. Национальнай бибилэтиэкэ тэриллибитэ 100 сыла туоларын, СӨ Бырабыыталыстыбата анал тэрээһиннэр былааннарын бигэргэппитин санатта.
Саргылана Максимова Ил Түмэн дьокутааттарыттан Национальнай бибилэтиэкэ сүрүн куорпуһун өрөмүөнүн түмүктүүргэ көмөлөһөллөрүгэр, итиэннэ IV норуоттар икки ардыларынааҕы библиографическай конгресс 2025 с. ыытыллыытын өйүүллэригэр көрдөстө. Этиитин түмүктүүрүгэр бибилэтиэкэ туһунан сокуон ылыллыытын көҕүлээбит ИТ бастакы вице-испиикэригэр А.Н.Жирковка махтанна уонна бу бибилэтиэкэ туһунан Арассыыйаҕа бастакы сокуон этэ диэтэ.
Төгүрүк остуолга тыл этиитигэр Нам кииннэммит бибилэтиэкэтин дириэктэрэ Майя Софронова, Анаабыртан дириэктэр Марфа Боярская кытыннылар.
Кинилэри тэҥэ норуот дьокутааттара Антонина Григорьева, Алена Атласова, Елена Голомарева, Александр Корякин, Иван Данилов чуолкайдыыр ыйытыылары биэрдилэр. Ол курдук, кинлэр Национальнай бибилэтиэкэ 100 сылын тэрээһиннэрин, бэтэрээннэри наҕараадалааһын, бэчээти сурутууга үбү эбии, оҕо бибилэтиэкэлэрин сайыннарыы боппуруостарын интэриэһиргээтилэр.
Төгүрүк остуол түмүгүнэн 6 пууннаах Сүбэлээһиннэр ылылыннылар.
Ону сэргэ төгүрүк остуол кэмигэр бастыҥ үлэлээх кииннэммит бибилэтиэкэлэр дириэктэрдэрэ Варвара Окоемова (Уус Алдан), Марфа Боярская (Анаабыр), Анна Иванова (Горнай), Айталина Иванова (Булуҥ), Оксана Корнилова (Хаҥалас), Татьяна Шевченко (Нерюнгри) наҕараадалары туттулар.
Галина БОЧКАРЕВА
-
0
-
0
-
0
-
0
-
0
-
0
