Кини оробуочай сырыытын Аартыкатааҕы судаарыстыбаннай агротехнологическай университет салалтатын уонна устудьуоннарын кытта көрсүһүүттэн саҕалаата. Көрсүһүү кэнниттэн арыаллыы сылдьар Ил Түмэн дьокутааттарын кытта мас олортулар.
Күн иккис аҥаарыгар Ил Түмэҥҥэ ВКС эрэсииминэн ыытыллыбыт сүбэ мунньах үлэтигэр кытынна. Мунньах бэбиэскэтигэр РФ Төрүт Сокуонугар көннөрүүлэри киллэрии сүнньүнэн айылҕа ресурсаларыгар, сир сыһыаннаһыыларгар сыһыаннаах өттүн уонна өрөспүүбүлүкэ туруорар боппуруостарын дьүүллэстилэр.
Ил Түмэн Бэрэссэдээтэлин бастакы солбуйааччы Александр Жирков: “Госдума кэмитиэттэриттэн биһиги өрөспүүбүлүкэбитин кытта айылҕа ресурсаларын, бас билии уонна сир сыһыаннаһыыларын кэмитиэтэ саамай чугастык алтыһар, үлэһэр. Николай Петрович бу биһиэхэ бастакы сырыыта буолбатах. Кинилиин 2018 сыллаахха сүбэ мунньах ыытан, Ойуур форума Дьокуускайга ыытылларыгар быһаарыы ылыммыппыт уонна былырыын бэс ыйыгар олоххо киллэрбиппит. Биһиги өрөспүүбүлүкэбит бу кэмитиэккэ хас да этиини киллэрбитэ билигин үлэҕэ сылдьар. Бары боппуруоска биһигини өйүүллэр уонна проблеманы быһаарсарга мэлдьи бэлэмнэр”, -- диэн бэлиэтээтэ.
Дойду таһымнаах дьокутаат Николай Николаев саха парламентарийдара бииргэ айымньылаахтык үлэлэһэллэригэр махтанан туран, сэлии уҥуоҕун эргииргэ таһаарары сүрүннүөхтээх сокуон барыла 90 бырыһыан сөбүлэһиннэриллибитин, РФ бырабыыталыстыбатын бэрэссэдээтэлин солбуйааччы Алексей Гордеев өйүүрүн, илии баттыырга бэлэмин иһитиннэрдэ итиэннэ бу хотугу сир олохторугар-дьаһахтарыгар дьоһун суолталаах сокуону оннуттан хамнатарга өрөспүүбүлүкэ баһылыга Айсен Николаевтыын көрсөн сүбэлэһэр баҕалааҕын биллэрдэ.
Госдума дьокутаата бүгүн, алтынньы 7 күнүгэр, Экология, айылҕаны туһаныы уонна ойуур хаһаайыстыбатын министиэристибэтигэр “Экология” национальнай бырайыагы олоххо киллэрии сүнньүнэн сэдэх, ураты кыылы-сүөлү харыстааһыҥҥа анаан ыытыллар сүбэ мунньах үлэтигэр кыттар. Николай Николаев онтон салгыы Аллараа Халыма улууһугар айанныаҕа.
-
0
-
0
-
0
-
0
-
0
-
0
