2021 сыл бэс ыйын 17 күнүгэр Ил Түмэн XXVIII уочарата суох пленарнай мунньаҕар норуот дьокутааттара Судаарыстыбаннай Мунньах Бэрэссэдээтэлэ П.В. Гоголев болдьоҕун иннинэ дуоһунаһыттан уурайарын туһунан дьаһалы ылыммыттара. Санаттахха, Петр Васильевич саҥа тэриллибит Конституционнай Сүбэ бэрэссэдээтэлинэн талыллыбыта. Онон, мантан ыла саҥа конституционнай уорганы салайыахтаах.
Ил Түмэн XXIX уочараттаах пленарнай мунньаҕар “Биир ньыгыл Арассыыйа” бэлитиичэскэй баартыйа фракциятын салайааччы Антонина Григорьева парламент бэрэссэдээтэлин дуоһунаһыгар Ил Түмэн судаарыстыба тутулугар уонна сокуону оҥорууга сис кэмитиэтин бэрэссэдээтэлин Алексей Ильич Еремеев кандидатуратын киллэрэн билиһиннэрдэ уонна мэктиэлээтэ. Даҕатан эттэххэ, атын фракциялар бэйэлэрин кандидаттарын туруорбатахтара.
– Алексей Ильич Еремеев биһиэхэ саҥа киһи буолбатах. Кини үрдүк таһымнаах уонна киэҥ билиилээх бэлиитик. Ситэриилээх былааска уонна сокуону оҥоруу үлэтигэр баай уопуттаах. Билигин кини бэлитиичэскэй үлэни-хамнаһы саамай кыайар сааһыгар – 48 сааһыгар сылдьар. Алексей Еремеев өрөспүүбүлүкэни барытын билэр. Улуустар кыахтарыгар, кыһалҕаларыгар быһаарсар. Бу барыта парламент салайааччыта буолуохтаах киһиэхэ олус наадалаах билиилэр. Алексей Ильич парламент үлэтин үтүө үгэстэрин, бэлитиичэскэй утумун салҕыаҕа уонна өрөспүүбүлүкэ уопсастыбатын сайдыытыгар улахан кылаатын киллэриэҕэ, – диэн Антонина Афанасьевна кандидат туһунан сырдатта.
Алексей Ильич бэйэтин аатыттан Саха Өрөспүүбүлүкэтин Ил Дарханыгар Айсен Николаевка уонна норуот дьокутааттарыгар өйөбүллэрин иһин дириҥ махталын биллэрдэ. Ол кэннэ саҥа дуоһунаска инники үлэтин сыалын-соругун кытта билиһиннэрдэ. Норуот дьокутааттара, фракциялар салайааччылара (Виктор Губарев, Игорь Григорьев, Евгений Перфильев) уонна Госдума дьокутаата Гаврил Парахин кандидаты ырыттылар уонна бэйэлэрин санааларын этиннилэр. Онтон кистэлэҥ куоластааһын түмүгүнэн Алексей Еремеевы саҥа дуоһунаһыгар бигэргэттилэр (уопсайа мунньахха баар 58 норуот дьокутаата куоластаабытыттан: "сөбүлэһэбин" – 57 куолас, "утарабын" – 1 куолас). Александр Жирков саҥа талыллыбыт спикери эҕэрдэлээтэ уонна Судаарыстыбаннай Мунньах Бэрэссэдээтэлин мандаатын туттарда.
СӨ Ил Дархана Айсен Николаев кандидатураны өйөөтө уонна Алексей Еремеев Ил Түмэн бэрэссэдээтэлин дуоһунаһыгар талыллан “парламент үлэтигэр иккис тыыны киллэриэҕэ” диэн эрэллээҕин биллэрдэ.
-
0
-
0
-
0
-
0
-
0
-
0
