Видеокэмпириэнсийэ киэбинэн ыытыллыбыт мунньахха Канада, Дания, Гренландия, Финляндия, Исландия, Норвегия, Швеция, АХШ, Саами парламеннарын, Европа парламенын, Хотугу сэбиэт, Хотугулуу-Арҕааҥҥы сэбиэт бэрэстэбиитэллэрэ кыттыыны ыллылар.
– Кэнники сылларга Арктиканы сайыннарыы судаарыстыбаннай бэлиитикэтин олоххо киллэрии сыалыгар-соругар уонна ырычаахтарыгар тирэх буолар докумуоннар ылылыннылар, – диэтэ Александр Акимов. – Арктика сэбиэтин 2021-2023 сс. салайарыгар Арассыыйа «Туруктаах Арктикаҕа – эппиэтинэстээх салайыы» луоһунунан салайтарар. Федерация Сэбиэтэ Арктика зонатыгар олоҕу-дьаһаҕы хааччыйыы боппуруостарыгар, Арктиканы туруктаахтык сайыннарыыга ураты болҕомтотун уурар. Сэбиэт үлэтин көдьүүһүн үрдэтэргэ, хаачыстыбатын тупсарарга икки оробуочай бөлөх тэриллэн үлэлиир: социальнай-экономическай сайдыы боппуруостарыгар итиэннэ энергетика, инфраструктура уонна экология боппуруостарыгар. Бу икки бөлөх сүбэ мунньахтарын чэрчитинэн, Арктика зонатын социальнай-экономическай сайдыытыгар тирээн турар боппуруостар көрүллэллэр.
Экология туруга, килиимэт уларыйыыта ураты болҕомтону эрэйэллэр. Күннэтэ тахсар бөх-сах уонна бырамыысаланнас быраҕар тобохторо тулалыыр эйгэни киртитиилэрэ сытыы кыһалҕа буолбутун санатан, Александр Акимов Санкт-Петербурга ыытыллыбыт Неватааҕы аан дойду таһымнаах IX экологическай конгресска Арассыыйа тулалыыр эйгэ харыстабылыгар бииргэ үлэлииргэ туһаайыллыбыт экология бэбиэскэтин олоххо киллэрэр бэлиитикэтин билиһиннэрбитин эттэ. «Ыраас Арктика» уопсастыбаннай федеральнай бырайыагы олоххо киллэрии хаамыытын, 2 тыһыынча доброволец сайыҥҥы кылгас кэм устатыгар Арктикаттан 1500 туонна тобоҕу, хаарбах тимири хомуйбутун кэпсээтэ. Арктика төрүт олохтоох аҕыйах ахсааннаах омуктарын төрүт хаһаайыстыбанай дьарыктарын өйөөһүн судаарыстыбаннай бырагырааматын, үөрэхтээһин саҥа киэбин сайыннарыыга уонна төрүт тылынан үөрэнэр кинигэлэри, босуобуйалары таһаарыыга анаммыт «Арктика оҕолоро» бырагыраама туһунан билиһиннэрдэ. Арктика зонатыгар киирэр эрэгийиэннэр оҕолоро Арассыыйа бастыҥ куруортарыгар бохсо сынньанар кыахтаммыттарын, онуоха федеральнай бүддьүөттэн сыллата 500 мөл. солк. харчы көрүллүөҕүн эттэ.
– Арктика экономикатын түргэнник сайыннарыыга сүрүн оруолу инфраструктураны сайыннарыы ылар, ол бастатан туран Хотугу муора суолуттан улахан тутулуктаах, – диэтэ Александр Акимов итиэннэ тырааныспар-логистика инфраструктуратын туһунан кэпсээтэ. Тирээн турар боппуруостары быһаарыыга парламеннар икки ардыларыгар бииргэ үлэлээһин биэрэр кыахтарын көдьүүстээхтик туһанар наадатын бэлиэтээтэ.
-
0
-
0
-
0
-
0
-
0
-
0
