Арассыыйа историятыгар барыта биэс төгүл дефолт биллэриллибит буоллаҕына, онтон иккитэ 90-с сылларга буолбута (1991 с. уонна 1998 с.). Бастакы Бэрэсидьиэн М.Е. Николаев кыахтаах уонна сатабыллаах салалтатынан өрөспүүбүлүкэбит этэҥҥэ ити дьыллары туораабыта, Саха Сирэ сайдар бөҕө акылаата ууруллубута.
РФ Үп министэристибэтин 2022 сыл олунньу 1 күнүнээҕи туругунан, Арассыыйа тас дойдуларга иэһэ - 59,5 млрд доллар, ол иһигэр тас облигацияларга - 38,97 млрд доллар. Кулун тутар 16 күнүгэр Арассыыйа бэйэтин сувереннай еврооблигацияларын икки купуонун 117,2 мөл. доллар суумаҕа төлүөхтээх этэ. Бу иннинэ РФ Үп министэристибэтэ бэйэтин эбэһээтэлистибэлэрин толорорго бэлэмин биллэрбитэ. Ол эрэн сааҥсыйаларынан сибээстээн, долларынан харчы ааһыа суоҕун сөп, оччотугар дефолт тэҥэ сыаналанар, ол эбэтэр дойду кирэдьиит эбэһээтэлистибэлэрин кыайан толорботоҕунан ааҕыллыан сөп. "90-с сыллартан билигин балаһыанньа атын, төрдүттэн уратылаах", -диэн экспертэр быһаараллар. Евробондалары төлүүргэ харчы баар. Ити, бастатан туран, билигин санкцияларынан тоҥон сытар көмүс резервэлэр буолар.
Арассыыйа төлөбүрдэрин, сааҥсыйа усулуобуйаларыгар хааччыйаары, Арассыыйа Бэрэсидьиэнэ тас дойдулар кирэдьиит биэрээччилэрэ Арассыыйа бааныгар солкуобайдаах счет арыйалларыгар көҥүл биэрбитэ, ол эбэтэр булгуччулаах харчыны ити счекка түһэрэргэ кулун тутар 2 күнүгэр ыйаахха илии баттаабыта. Маннык схеманан судаарыстыба, эрэгийиэннэр, муниципалитеттар уонна хампаанньалар сааҥсыйа биллэрбит тас тойдуларга кирэдьиит иэстэрин төлүөхтэрин сөп.
- Кулун тутар 16 күнүгэр РФ Үп министиэристибэтэ евробонда купонун төлөбүрдэригэр төлөбүр сорудаҕын (платежнай поручение) ыыппыта, - диэн биэдэмистибэ пресс-сулууспата иһитиннэрдэ. - Арассыыйа бэйэтин хааччынар сүдү кыахтаах дойду, онон дефолка итэҕэйбэппин, — диэтэ Госдума үпкэ кэмитиэтин баһылыга Анатолий Аксаков РИА «Новости» пресс- кэмпириэнсийэтигэр — Маныаха туох да төрүөт суох.
- 0
- 0
- 0
- 0
- 0
- 0