СӨ экэниэмикэҕэ миниистирэ Петр Попов парламент бары сис кэмитиэттэрин кытта тустаах тосхолу саҥардарга кэккэ мунньахтар ыытыллыбыттарын бэлиэтээтэ. Саха Сирин социальнай-экэнэмиичэскэй сайдыытын тосхолун 2032 с. диэри, онтон 2050 с. диэри уһатарга 2018 с. ылыммыттара. Ол сүрүн сыаннаһа киһи олоҕун таһыма үрдүөхтээх, хаачыстыбата тупсуохтаах, олорорго табыгастаах усулуобуйа тэриллиэхтээх, үлэлииргэ, үүнэргэ-сайдарга кыах баар буолуохтаах. Ону ситиһэргэ федеральнай бэбиэскэни кытта сөп түбэһиннэрэн, кэккэ көрдөрүүлэри уларытан, аныгы олох ирдэбилигэр дьүөрэлээн биэриэхтэрэ.
Петр Попов 2018-2024 сс. тосхол сүрүн ситиһиилэрин билиһиннэрдэ. Өрөспүүбүлүкэ иһигэр оҥоһуллар табаар уонна өҥө икки төгүл улаатан, 2,5 трлн. солк. тиийдэ. Олохтоох экэниэмикэни сайыннарарга 4 трлн. солк. үбү укпуттар. Үлэтэ суох буолуу ахсаана 3,8% диэри түспүт, дьадайыы 2024 с. 12,8% диэри кыччаабыт. Быраастар кыһыл оҕо өлүүтүн тохтотор былааннарын ситиспиттэр, ол эрэн сорох демографическай көрдөрүүгэ былаан өссө туола илик.
2025 с. саҥа национальнай бырайыактар киирдилэр, ону учуоттаан тосхолу саҥардан биэриэхтэрэ, туруоруллубут сыалы ситиһэргэ, Уһук Илин сайдыытын федеральнай тосхолун чэрчитинэн тустаах тосхолу 2036 с. диэри уһатыахтара. Бырайыакка 35 сүрүн, ону таһынан, үрдүкү дуоһунастаах киһи үлэтин көдьүүһүн сыаналыырга 16 статистика көрдөрүүтэ, саҥа индикатордар киирдилэр.
СӨ Үлэҕэ уонна социальнай сайдыыга миниистир Елена Волкова элбэх оҕолоох ыалларга биир кэлим босуобуйа төлүүргэ кинилэр дохуоттарын көрөргө 10% аһары барыы көҥүллэнэрин туһунан уларыйыы баарын туһунан иһитиннэрдэ. Ону таһынан, бу сылтан хамнас алын кээмэйэ 20,7% үрдүөхтээх уонна кэккэ үлэһиттэргэ хамнаһы төлүүргэ тус сыаллаах ирдэбил туолуохтаах. Дьадайыыны аччатарга социальнай хантыраагы тутталлар, нэһилиэнньэ сорох араҥатыгар дьиэ кэргэн дохуотун көрбөттөр эбит.
СӨ доруобуйаҕа харыстабылын миниистирин солбуйааччы Татьяна Павлова этэринэн, 2025 с. дьон олоҕун уһуна 75,26 сааска тиийбит, бүтэһик биэс сыл иһигэр дьон, кыра оҕо өлүүтэ аҕыйаабыт.
СӨ нэһилиэнньэтэ дьарыктаах буолуутун кэмитиэтин бэрэссэдээтэлин солбуйааччы Георгий Борисов этэринэн, 2025 с. үлэтэ суох буолуу 3,7%, оттон тосхолго сурулларынан 2025-2026 сс. 5% куоһарыа суохтаах диэн ыйыллар. Приоритетнай сорук быһыытынан эбии үлэ миэстэтин таһаарыахтара, дьон сатабылын, дьоҕурун арыйыахтара, саҥа сиргэ үлэлии барарга мобильнай буоларын хааччыйыахтара. 2036 с. эрэгийиэн экэниэмикэтигэр 546-559 тыһ. киһи үлэлиэҕэ, билиҥҥи кэми кытта тэҥнээн көрдөххө, 5,8 тыһ. киһи эбиллиэҕэ.
Дакылааччыттары истэн баран норуот дьокутааттара Алена Атласова, Светлана Давыдова, Афанасий Постников, Иван Данилов ыйытыктары биэрдилэр. Боппуруостар дьоҕус атомнай ыстаансыйаны тутуу, нэһилиэнньэни олохсутарга тыа сиригэр толору хааччыллыылаах дьиэни-уоту тутуу былаанын, тиэхиньикэҕэ, тырааныспарга уматык сыанатын удамыр оҥоруу о.д.а. экэниэмикэ салаатын таарыйдылар.
Мунньах түмүгэр СӨ экэниэмикэҕэ миниистирэ Петр Попов сис кэмитиэттэр этиилэрин кулун тутар 28 күнүгэр диэри киллэрэллэригэр ыҥырда. Саха Сирин социальнай-экэнэмиичэскэй сайдыытын тосхолун 2032 с. диэри уонна 2050 с. диэри тус сыаллаах көрөр СӨ сокуонун Ил Түмэн аны сайын бэс ыйыгар буолар пленарнай мунньаҕар көрүөхтэрэ.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
